കേരളത്തിന് നന്ദി പറഞ്ഞ് ഇൽസി ലാത്വിയയിലേയ്ക്ക് മടങ്ങുന്നു

തിരുവനന്തപുരം: കാണാതായ സഹോദരിയ്ക്കു വേണ്ടിയുള്ള അന്വേഷണത്തിൽ ഒപ്പം നിന്ന കേരളത്തിന് നന്ദി പറഞ്ഞ് ഇൽസി ജന്മനാട്ടിലേയ്ക്ക് മടങ്ങുന്നു. കോവളത്ത് ക്രൂരപീഡനത്തിനിരായി കൊല്ലപ്പെട്ട നിലയിൽ കണ്ടെത്തിയ ലാത്വിയൻ സ്വദേശിനിയുടെ സഹോദരി സര്‍ക്കാരിനും സഹായിച്ച മറ്റുള്ളവര്‍ക്കും നന്ദി അറിയിച്ചു.

ഇനിയും കേരളത്തിലേയ്ക്കു വരുമെന്ന് ഇൽസി പറഞ്ഞു. ടൂറിസം മന്ത്രി കടകംപള്ളി സുരേന്ദ്രനെ ഓഫീസിലെത്തി കണ്ടതിനു ശേഷം സംസാരിക്കുകയായിരുന്നു അവര്‍.

സര്‍ക്കാരും ടൂറിസം മന്ത്രിയും തങ്ങളുടെ ദുഖത്തിൽ പങ്കുചേരുകയും ഒപ്പം നിൽക്കുകയു ചെയ്തത് മറക്കാനാവില്ല. ലാത്വിയയിലേയ്ക്കുള്ള മടക്കയാത്രയ്ക്കുള്ള ടിക്കറ്റും കേരള ടൂറിസവുമായി ബന്ധപ്പെട്ട പുസ്തകങ്ങളും ടൂറിസം മന്ത്രി ഇൽസിയ്ക്ക് സമ്മാനിച്ചു.

കണ്ടൽക്കാട്ടിൽ മൃതദേഹം കണ്ടെത്തിയ യുവാക്കള്‍ക്ക് കേരള സര്‍ക്കാര്‍ പ്രഖ്യാപിച്ച രണ്ടു ലക്ഷം രൂപയ്ക്ക് പുറമെ തങ്ങളുടെ കുടുംബത്തിന്‍റെ സമ്മാനമായി ഒരു ലക്ഷം രൂപ നൽകാനും സന്നദ്ധരാണെന്നും ഇൽസി അറിയിച്ചു. യുവാക്കളുടെ വിദ്യാഭ്യാസത്തിനു കൂടി ഉപകരിക്കുന്ന രീതിയിലായിരിക്കും തുക നിക്ഷേപിക്കുക.

സഹോദരിയെ നഷ്ടമായെങ്കിലും ഒപ്പം പിന്തുണയുമായെത്തിയ കേരളത്തോട് സ്നേഹമാണെന്നും ഇൽസി പറഞ്ഞു. രണ്ടു ദിവസം കൂടി കേരളത്തിൽ തങ്ങിയ ശേഷമായിരിക്കും ഇൽസിയുടെ മടക്കം.