പോസ്റ്റ് പ്രചാരണത്തിന് പണമിറക്കി ചെന്നിത്തല
സമൂഹമാധ്യമങ്ങളില്ലാതെ രാഷ്ട്രീയം പറയാൻ ഇത്തിരി ബുദ്ധിമുട്ടുള്ള കാലമാണിത്. മുഖ്യമന്ത്രിയായാലും പ്രതിപക്ഷ നേതാവായാലും ജനങ്ങളോട് സംവദിക്കണമെങ്കിൽ ഫേസ്ബുക്കും ട്വിറ്ററും ഇൻസ്റ്റഗ്രാമും അങ്ങനെ മലയാളികളെവിടെയൊക്കെയുണ്ടോ അവിടെയെല്ലാം അക്കൗണ്ടെടുത്തേ തീരൂ. കേരളത്തിലെ രാഷ്ട്രീയക്കാരിൽ ഫേസ്ബുക്ക് റീച്ചിന്റെ കാര്യത്തിൽ മുഖ്യമന്ത്രി പിണറായി വിജയനാണ് ഒന്നാം സ്ഥാനത്ത്. 12 ലക്ഷത്തിലധികം പേരാണ് അദ്ദേഹത്തെ ഫേസ്ബുക്കിൽ പിന്തുടരുന്നത്. തൊട്ടു പിന്നാലെ രമേശ് ചെന്നിത്തലയുമുണ്ട് പത്ത് ലക്ഷത്തിൽ അധികം പേരാണ് അദ്ദഹത്തിന്റെ പേജിൽ ലൈക്ക് ചെയ്തിരിക്കുന്നത്. ഇത്രയധികം പേ‍ര്‍ അദ്ദേഹത്തെ ഫോളോ ചെയ്യുന്നുണ്ടെങ്കിലും ആരാണ് റീച്ചിന്റെ കാര്യത്തിൽ കേമനെന്ന് ചോദിച്ചാൽ അത് പിണറായി തന്നെയാണെന്ന് പറയേണ്ടിവരും. കാരണം അദ്ദേഹത്തിന്റെ ഔദ്യോഗിക പേജിലെ പോസ്റ്റുകളുടെ പ്രചാരണത്തിന് അദ്ദേഹം ചില്ലി കാശ് ചെലവഴിച്ചിട്ടില്ല. എന്നാൽ രമേശ് ചെന്നിത്തലയുടെ കാര്യം അങ്ങനെയല്ല, കണക്കുകൾ നോക്കാം.
ലൈക്ക് കിട്ടാൻ പണം
കൊറോണ വൈറസ് പടർന്നുപിടിച്ച കാലത്ത് തുടർച്ചയായി വാർത്താ സമ്മേളനം വിളിച്ച് ജനങ്ങളോട് സംവദിച്ച ആരോഗ്യ മന്ത്രി കെകെ ശൈലജയ്ക്ക് മീഡിയ മാനിയ ആണെന്നാണ് പ്രതിപക്ഷ നേതാവ് രമേശ് ചെന്നിത്തല പറഞ്ഞത്. എന്നാൽ തന്റെ ഫേസ്ബുക്ക് പോസ്റ്റുകൾക്ക് ലൈക്ക് നേടാൻ രമേശ് ചെന്നിത്തല പണമിറക്കുന്നുണ്ടെന്നാണ് അദ്ദേഹത്തിന്റെ ഔദ്യോഗിക ഫേസ്ബുക്ക് പേജ് വ്യക്തമാക്കുന്നത്. ഫേസ്ബുക്ക് ലൈക്കിനായി 2019 ഫെബ്രുവരി എട്ട് മുതൽ 2021 ഫെബ്രുവരി 11 വരെ 363,628 രൂപയാണ് അദ്ദേഹം ചെലവഴിച്ചിരിക്കുന്നത്. ഐശ്വര്യ കേരള യാത്രയുടെ പ്രചരണത്തിന് ഫെബ്രുവരി അഞ്ച് മുതൽ 11 വരെ 125,951 രൂപയാണ് അദ്ദേഹം ഫേസ്ബുക്കിന് നൽകിയിരിക്കുന്നത്. കൂടാതെ പത്ത് പേർ ചേർന്നാണ് അദ്ദേഹത്തിന്റെ പേജ് നിയന്ത്രിക്കുന്നത്. എട്ട് പേർ ഇന്ത്യയിൽ നിന്നും രണ്ട് പേർ യുഎഇയിൽ നിന്നും.
ചില്ലി കാശ് കൊടുക്കാതെ പിണറായി
ഫേസ്ബുക്ക് പോസ്റ്റുകളുടെ പ്രചാരണത്തിന് പിണറായി വിജയന്റെ ഔദ്യോഗിക ഫേസ്ബുക്ക് പേജ് ഒരു രൂപ പോലും ചെലവഴിച്ചിട്ടില്ല. പിണറായി മാത്രമല്ല, ആരോഗ്യ മന്ത്രി കെകെ ശൈലജ, തോമസ് ഐസക്, അടക്കമുള്ള മന്ത്രിമാരും തങ്ങളുടെ ഔദ്യോഗിക ഫേസ്ബുക്ക് പേജിലെ പോസ്റ്റ് റിച്ചീനായി പണം ചെലവാക്കിയിട്ടില്ലെന്നാണ് അവരുടെ ഫേസ്ബുക്ക് പേജുകൾ വ്യക്തമാക്കുന്നത്. എന്നാൽ മുഖ്യമന്ത്രിയുടെ ഫേസ്ബുക്ക് പേജായ 'ചീഫ് മിനിസ്റ്റർ ഓഫ് കേരള' എന്ന പേജ് വഴി 8 ഫെബ്രുവിരി 2020 മുതൽ 11 ഫെബ്രുവരി 2021 വരെ 152,310 രൂപയാണ് ചെലവഴിച്ചിരിക്കുന്നത്. ഇത് കൊറോണ വൈറസുമായി ബന്ധപ്പെട്ട ഫേസ്ബുക്ക് പോസ്റ്റുകൾ പ്രചരിപ്പിക്കുന്നതിനാണെന്നാണ് പരിശോധനയിൽ വ്യക്തമായിട്ടുള്ളത്. കൂടാതെ അടുത്ത ദിവസങ്ങളിലൊന്നും പണം ചെലവാക്കിയുള്ള പോസ്റ്റ് പ്രചാരണം നടന്നിട്ടുമില്ല. അതേസമയം എൽഡിഎഫ് കേരളത്തിന്റെ ഫേസ്ബുക്ക് പേജിൽ പരസ്യ ഇനത്തിൽ ഫെബ്രുവരി 2019 മുതൽ ഇതുവരെ 2,465,314 രൂപ ചെലവാക്കിയിട്ടുണ്ട്. ലോക്സഭാ തെരഞ്ഞെടുപ്പുമായി ബന്ധപ്പെട്ടാണ് ഇത്. എന്നാൽ യുഡിഎഫ് കേരളത്തിന്റെ പേജിൽ ഒരു രൂപ പോലും ചെലവാക്കിയതായി കാണുന്നില്ല.
'മീഡിയ മാനിയ' ഇല്ലാത്ത മറ്റുള്ളവർ
കോൺഗ്രസ് നേതാവ് ഉമ്മൻ ചാണ്ടി, കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ, മുസ്ലിം ലീഗ് ദേശീയ ജനറൽ സെക്രട്ടറി പികെ കുഞ്ഞാലിക്കുട്ടി, ബിജെപി സംസ്ഥാന അധ്യക്ഷൻ കെ സുരേന്ദ്രൻ, സിപിഎം മുൻ സംസ്ഥാന സെക്രട്ടറി കോടിയേരി ബാലകൃഷ്ണൻ ഇവരൊന്നും പണമിറക്കിയുള്ള പോസ്റ്റ് പ്രചാരണം നടത്തിയതായി കാണുന്നില്ല. അതേസമയം, ഇന്ത്യൻ നാഷ്ണൽ കോൺഗ്രസ്-കേരളയുടെ പേജിൽ 7,680 രൂപയും ബിജെപി കേരളത്തിന്റെ പേജിൽ 29,106 രൂപയും ഇതുവരെ പരസ്യ ഇനത്തിൽ ചെലവാക്കിയിട്ടുണ്ട്. അതേസമയം, ഫേസ്ബുക്ക് പരസ്യങ്ങളിലൂടെ 2021 നിയമസഭാ തെരഞ്ഞെടുപ്പ് അങ്കത്തിന് തുടക്കം കുറിച്ചിരിക്കുകയാണ് പ്രതിപക്ഷ നേതാവ് രമേശ് ചെന്നിത്തല. വരുന്ന തെരഞ്ഞെടുപ്പിൽ രാഷ്ട്രീയ പ്രചരണത്തിനുള്ള പ്രധാന ഉപാധി സോഷ്യൽ മീഡിയതന്നെയെന്ന് ഇതോടെ വ്യക്തം.