കുട്ടികളുടെ എണ്ണത്തിൽ വര്‍ധന; വരുന്നത് പതിനായിരത്തോളം അധ്യാപക ഒഴിവുകള്‍

കോട്ടയം: സംസ്ഥാനത്ത് സര്‍ക്കാര്‍, എയ്ഡഡ് സ്കൂളുകളിൽ വിദ്യാര്‍ഥികളുടെ എണ്ണത്തിലുണ്ടായ ഭീമമായ വര്‍ധന കൂടുതൽ അധ്യാപക ഒഴിവുകള്‍ക്ക് വഴിതുറക്കുന്നു. എൽപി, യുപി വിഭാഗങ്ങളിൽ ഈവര്‍ഷം 6000 അധ്യാപകരെ നിയമിക്കുമെന്ന് പിഎസ്‍‍സി ചെയര്‍മാൻ എം കെ സക്കീര്‍ വെളിപ്പെടുത്തിയതായി മനോരമ റിപ്പോര്‍ട്ട് ചെയ്തു. ഇതേ രീതിയിൽ ഹൈസ്കൂള്‍, ഹയര്‍ സെക്കണ്ടറി വിഭാഗങ്ങളിലും നിയമനം നടത്തിയാൽ പുതുതായി പുതുതായി പതിനായിരത്തോളം ഒഴിവുകളുണ്ടാകുമെന്നാണ് റിപ്പോര്‍ട്ടുകള്‍.

25 വര്‍ഷത്തിനു ശേഷമാണ് സംസ്ഥാനത്തെ സര്‍ക്കാര്‍, എയ്ഡഡ് സ്കൂളുകളിൽ വിദ്യാര്‍ഥികളുടെ എണ്ണത്തിൽ വര്‍ധന രേഖപ്പെടുത്തുന്നത്. ഈ വര്‍ഷം സ്കൂളുകളിൽ 32349 വിദ്യാര്‍ഥികളാണ് കൂടിയത്. കഴിഞ്ഞ വര്‍ഷം 147145 അധ്യാപകരാണ് സംസ്ഥാനത്തെ 32.67 ലക്ഷം വിദ്യാര്‍ഥികളെ പഠിപ്പിക്കാനുണ്ടായിരുന്നത്. എന്നാൽ വിദ്യാര്‍ഥികള്‍ കൂടുന്നതോടെ കൂടുതൽ ഡിവിഷനുകള്‍ സൃഷ്ടിക്കപ്പെടും. ഇതോടെ കൂടുതൽ അധ്യാപകരെയും ആവശ്യമായി വരും.