സ്കൂളുകൾ ഉടൻ തുറക്കുന്നത് അപകടം: സർക്കാരിനു മുന്നറിയിപ്പുമായി ഐഎംഎ

കൊച്ചി: അടുത്ത വര്‍ഷത്തെ അധ്യയന വര്‍ഷത്തേയ്ക്കുള്ള തയ്യാറെടുപ്പുകള്‍ സംസ്ഥാന സര്‍ക്കാര്‍ ആരംഭിക്കാനിരിക്കേ മുന്നറിയിപ്പുമായി ഇന്ത്യൻ മെഡിക്കൽ അസോസിയേഷൻ രംഗത്ത്. രോഗലക്ഷണങ്ങളില്ലാതെ തന്നെ കൊവിഡ് പകരാമെന്നിരിക്കേ സ്കൂളുകള്‍ തുറക്കാനുള്ള തീരുമാനം അപകടമാണെന്നാണ് ഐഎംഎയുടെ നിര്‍ദേശം. കൂട്ടം കൂടാനുള്ള സാഹചര്യം ഒഴിവാക്കി വിദൂര പഠനവും ഓൺലൈൻ ക്ലാസുകളും വ്യാപകമാക്കാൻ ഐഎംഎ നിര്‍ദേശം നല്‍കിയെന്നാണ് റിപ്പോര്‍ട്ടുകള്‍.

അതേസമയം, പൊതുപരീക്ഷകള്‍ ഉള്‍പ്പെടെ നടത്തുമ്പോള്‍ സാമൂഹിക അകലം പാലിക്കല്‍ ഉള്‍പ്പെടെയുള്ള മുൻകരുതലുകള്‍ സ്വീകരിച്ചാൽ മതിയെന്ന് ഐഎംഎയുടെ വിദഗ്ധ സമിതി ശുപാര്‍ശ ചെയ്തിട്ടുണ്ട്. എന്നാൽ വിദ്യാഭ്യാസ സ്ഥാപനങ്ങള്‍ തുറന്ന് ക്ലാസുകള്‍ ആരംഭിക്കുന്നതിനെ സമിതി എതിര്‍ത്തു. ഇതിനു ഒരു മാസമെങ്കിലും കാത്തിരിക്കണം. സ്കൂളുകളിലും കോളേജുകളിലും വിദ്യാര്‍ഥികള്‍ കൂട്ടം കൂടാൻ സാധ്യതയുണ്ടെന്നും പ്രകടമായ രോഗലക്ഷണങ്ങള്‍ ഉണ്ടായില്ലെങ്കിലും കുട്ടികള്‍ രോഗവാഹകരാകാൻ സാധ്യതയുണ്ടെന്നും ഐഎംഎ മുന്നറിയിപ്പ് നല്‍കുന്നു. കുട്ടികള്‍ വഴി വീടുകളിലേയ്ക്കും രോഗമെത്താൻ സാധ്യതയുണ്ട്. വീടുകളില്‍ കുഞ്ഞുങ്ങളും ഗര്‍ഭിണികളും പ്രായമായവരും ഉണ്ടെങ്കില്‍ ഗുരുതരാവസ്ഥയിലെത്താം. ഈ സാഹചര്യത്തിൽ റിവേഴ്സ് ക്വാറൻ്റൈൻ ഉള്‍പ്പെടെ പാളുമെന്നും സമൂഹവ്യാപനത്തിനു സാധ്യതയുണ്ടെന്നുമാണ് ഐഎംഎ ചൂണ്ടിക്കാണിക്കുന്നത്.

Also Read: മുംബൈയിൽ മെയ് 31വരെ ലോക്ക് ഡൗൺ നീട്ടി; മറ്റു നഗരങ്ങൾ ഇവ

നിലവില്‍ പരിശോധനാ കിറ്റുകളുടെ ക്ഷാമമുള്ളതിനാല്‍ കൂടുതല്‍ പേരില്‍ പരിശോധന നടത്തുന്നത് പ്രായോഗികമല്ല. വിദ്യാലയങ്ങളില്‍ രോഗവ്യാപനമുണ്ടായാൽ നിയന്ത്രിക്കാൻ പ്രയാസമായിരിക്കുമെന്നും ഐഎംഎയുടെ വിദഗ്ധ സമിതി വ്യക്തമാക്കി.

Also Read: മുംബൈയിൽ മെയ് 31വരെ ലോക്ക് ഡൗൺ നീട്ടി; മറ്റു നഗരങ്ങൾ ഇവ

നിലവിലെ സാഹചര്യത്തില്‍ ജൂൺ ഒന്നിനു തന്നെ സ്കൂളുകള്‍ തുറക്കാനാകുമെന്ന പ്രതീക്ഷയാണ് വിദ്യാഭ്യാസ വകുപ്പിനുള്ളത്. ഓൺലൈൻ സംവിധാനം വഴി അധ്യാപകര്‍ക്കു പരിശീലനം നല്‍കാനും ക്ലാസുകള്‍ ആരംഭിക്കാനുമുള്ള നടപടികളാണ് പുരോഗമിക്കുന്നത്. പതിവു പോലെ ജൂൺ ഒന്നിനു തന്നെ ക്ലാസുകള്‍ തുടങ്ങാൻ കഴിഞ്ഞേക്കുമെന്ന് വിദ്യാഭ്യാസ മന്ത്രി സി രവീന്ദ്രനാഥ് അറിയിച്ചു. സാഹചര്യം അനുകൂലമല്ലെങ്കില്‍ ഓൺലൈൻ വഴി ക്ലാസുകള്‍ തുടങ്ങുമെന്നും മന്ത്രി വ്യക്തമാക്കി.