അകക്കണ്ണിൻ കാഴ്ച്ചയുമായി പുതിയ അസിസ്റ്റന്റ് കളക്ടർ

കൊച്ചി : ഉൾക്കാഴ്ച്ചയുടെ കരുത്തിൽ ഐഎ‌എസ് നേടി ശ്രദ്ധനേടിയ പ്രഞ്ജാൽ പാട്ടീൽ എറണാകുളം ജില്ലയുടെ അസിസ്റ്റന്റ് കളക്ടറായി ചുമതലയേറ്റു. ഐഎ‌എസ് അക്കാദമിയിൽ നിന്ന് പരിശീലനം പൂർത്തിയാക്കിയ പ്രജ്ഞാലിന്റെ ആദ്യ നിയമനമാണ് കൊച്ചിയിൽ.

കഴിഞ്ഞ വർഷത്തെ ഐഎഎസ് പരീക്ഷയിൽ 124 -ാം റാങ്ക് നേടിയാണ് പ്രഞ്ജാൽ വിജയിച്ചത് .2016 ൽ 777 -ാം റാങ്ക് നേടിയ പ്രഞ്ജാലിന് ‌റെയിൽവേയിൽ പ്രവേശനം ലഭിച്ചിരുന്നു . എന്നാൽ റെയിൽവേയിൽ പൂർണമായും കാഴ്ച്ചശേഷി നഷ്ടപ്പെട്ടവരെ എടുക്കാനാകില്ലെന്ന് വകുപ്പ് വ്യക്തമാക്കി. തുടർന്ന് പോസ്റ്റൽ വകുപ്പിലായിരുന്നു അവർ ജോലിക്ക് കയറിയത്.

പരിശീലന കാലയളവിനിടെ വീണ്ടും പഠിച്ച് പരീക്ഷയെഴുതിയ പ്രഞ്ജാലിന് ഉയർന്ന റാങ്കു ലഭിച്ചതോടെയാണ് ‌ഐഎ‌എസ് സാദ്ധ്യമായത്. സരസ്വതി വിദ്യാമന്ദിറിൽ നിന്ന് പ്രാഥമിക വിദ്യാഭ്യാസവും പിന്നീട് മുംബൈ സെന്റ് സേവ്യേഴ്സ് കോളേജിൽ നിന്ന് പൊളിറ്റിക്കൽ സയൻസിൽ ബിരുദവും നേടിയ പ്രഞ്ജാൽ ഡൽഹി ജെ‌എൻയുവിൽ നിന്ന് ഇന്റർനാഷണൽ റിലേഷൻസിൽ ബിരുദാനന്തര ബിരുദവുമെടുത്തിട്ടുണ്ട്.

ആറാം വയസ്സിൽ ഒരു അപകടത്തിൽപെട്ട് കാഴ്ച് നഷ്ടമായിട്ടും പ്രതികൂല സാഹചര്യങ്ങളോട് പടവെട്ടിയാണ് പ്രഞ്ജാൽ പഠനവും തുടർന്ന് ഐഎ‌എസ് എന്ന സ്വപ്നവും യാഥാർത്ഥ്യമാക്കിയത്. പ്രത്യേക സോഫ്റ്റ്‌വെയറിന്റെ സഹായത്തോടെയാണ് താൻ പഠിച്ചതെന്നും സാങ്കേതിക വിദ്യ പഠനത്തിൽ നിർണായക സ്വാധീനം ചെലുത്തിയെന്നും അവർ വ്യക്തമാക്കുന്നു. കേരളത്തിൽ പോസ്റ്റിംഗ് ലഭിച്ചതിൽ അതിയായ സന്തോഷമുണ്ടെന്ന് സ്ഥാനമേറ്റെടുത്തതിനു ശേഷം പ്രഞ്ജാൽ മാധ്യമങ്ങളോട് പറഞ്ഞു.