ഇന്ദിരാഭവന് 10000 രൂപ; ലീഗിനെ ബന്ധപ്പെട്ടാൽ കിട്ടുമെന്ന് 'OLX പരസ്യം'!

തിരുവനന്തപുരം: കോൺഗ്രസ് പോര് പുരോഗമിക്കുമ്പോൾ കെപിസിസി ആസ്ഥാനമായ ഇന്ദിരാഭവൻ ഒഎല്‍എക്‌സിൽ വിൽപനയ്ക്ക്. കേവലം 10000 രൂപയാണ് ഒഎല്‍എക്‌സിൽ ഇന്ദിരാഭവന് വിലയിട്ടിരിക്കുന്നത്. നേതൃത്വത്തെ പരിഹസിക്കുന്നതിനായി കോൺഗ്രസ് പ്രവർത്തകർ തന്നെ ഒപ്പിച്ച പണിയാണിത്. മുസ്ലീം ലീഗിനും കേരള കോണ്‍ഗ്രസിനും അടിയറവു പറഞ്ഞ കോണ്‍ഗ്രസിന് ഇനി എന്തിനാണ് ആസ്ഥാന മന്ദിരം എന്ന ചോദ്യവും പരസ്യത്തിനൊപ്പമുണ്ട്.

തിരുവനന്തപുരത്തിന്‍റെ ഹൃദയഭാഗത്ത് സ്ഥിതി ചെയ്യുന്ന കോൺഗ്രസ് ആസ്ഥാനമന്ദിരത്തിന് 58,888 ചതുരശ്രയടി വിസ്തീർണമാണുള്ളത്. വാങ്ങുന്നവര്‍ മുന്നോട്ട് വയ്ക്കുന്ന എല്ലാ നിബന്ധനകളും അംഗീകരിക്കുമെന്നും താൽപര്യമുള്ളവർ കേരള കോൺഗ്രസിനെയോ മുസ്ലീം ലീഗിനെയോ സമീപിക്കണമെന്നും പരസ്യത്തിൽ പറയുന്നു. വട്ടിയൂർക്കാവ് സ്വദേശി അനീഷ് എന്ന വ്യക്തിയാണ് വെബ്‌സൈറ്റില്‍ പരസ്യം നല്‍കിയിരിക്കുന്നത്.


സ്വന്തമായി ഉണ്ടായിരുന്ന രാജ്യസഭാ സീറ്റ് പോലും കേരള കോൺഗ്രസിന് അടിയറവ് വെച്ച കോൺഗ്രസിന്‍റെ വില ഇടിഞ്ഞെന്ന വസ്തുതയെ മുൻ നിര്‍ത്തി ട്രോളുകൾ തലങ്ങും വിലങ്ങും പായുന്നതിനിടെയാണ് ഒഎൽഎക്സ് പരസ്യം വന്നിരിക്കുന്നത്.