കൊല്ലുമെന്ന് എസ് ഡി പി ഐ; മിശ്ര വിവാഹിതർക്ക് ഭീഷണി

പ്രണയിച്ചു വിവാഹം കഴിച്ചതിന്‍റെ പേരിൽ എസ് ഡി പി ഐ തങ്ങളെ ഭീഷണിപ്പെടുത്തുന്നുവെന്ന് മിശ്രവിവാഹിതരായ ദമ്പതികള്‍. രണ്ടു ദിവസം മുമ്പാണ് തിരുവനന്തപുരം അറ്റിങ്ങല്‍ സ്വദേശി ഹാരിസണും ഷെഹാനയും വിവാഹിതരായത്. തുടര്‍ന്ന് വിവാഹ ഫോട്ടോ ഫേസ്ബുക്കില്‍ പോസ്റ്റ് ചെയ്തതു മുതലാണ് വധഭീഷണിയുണ്ടായതെന്നും ഇരുവരും ഫെയ്‌സ്ബുക്ക് വീഡിയോയിലൂടെ പറയുന്നു.

എസ്ഡിപിഐ നേതാക്കളായ കുറച്ചു പേരാണ് ഭീഷണിക്കു പിന്നില്‍, വിഡിയോയിൽ അവരുടെ പേരുകൾ പറയുന്നുമുണ്ട്. അച്ഛനെയും അമ്മയെയും അനിയത്തിയേയും കൊല്ലുമെന്നും ഭീഷണിപ്പെടുത്തി. പൊലീസ് സ്റ്റേഷനുമായി ബന്ധപ്പെടാന്‍ കഴിയുന്നില്ലെന്നും കെവിനെപോലെ തനിക്ക് ആവാന്‍ താത്പര്യമില്ലെന്നും ഹാരിസണ്‍ വീഡിയോയിൽ വ്യക്തമാക്കുന്നുണ്ട്.

ജാതിയും മതവും നോക്കിയല്ല പ്രണയിച്ചതെന്നും മതം മാറാന്‍ തങ്ങള്‍ പരസ്പരം നിര്‍ബന്ധിക്കുന്നില്ലെന്നും ഷെഹാനയും വിഡിയോയിൽ പറഞ്ഞു. സംഭവം ശ്രദ്ധയില്‍പ്പെട്ടതായും ആറ്റിങ്ങല്‍ പൊലീസ് വേണ്ട നടപടികള്‍ സ്വീകരിക്കുമെന്നും കേരള പൊലീസ് വീഡിയോ പുറത്തിറങ്ങിയ ശേഷം അറിയിച്ചിട്ടുണ്ട്. അതേസമയം ഇവർക്ക് ഇരുവർക്കും സംരക്ഷണം നൽകാൻ കോടതി നിർദ്ദേശിച്ചിട്ടുമുണ്ട്.