മന്ത്രിസഭയുടെ രണ്ടാം വാര്‍ഷികം: 'ജനകീയം 2018' പ്രദര്‍ശന വിപണന മേള തുടങ്ങി

കൊച്ചി: മന്ത്രിസഭയുടെ രണ്ടാം വാര്‍ഷികത്തോടനുബന്ധിച്ച് കൊച്ചിയിൽ പ്രദര്‍ശന വിപണന മേളയ്ക്ക് തുടക്കമായി. ജനകീയം 2018 എന്ന് പേരിട്ടിരിക്കുന്ന മേള സംഘടിപ്പിച്ചിരിക്കുന്നത് ജില്ലാ ഭരണകൂടത്തിന്‍റെയും ഇൻഫർമേഷൻ ആന്‍റ് പബ്ലിക് റിലേഷൻ വകുപ്പിന്‍റേയും ജില്ലാ ടൂറിസം പ്രമോഷൻ കൗൺസിലിന്‍റേയും സംയുക്താഭിമുഖ്യത്തിലാണ്. മെയ് 17 മുതൽ 22 വരെയാണ് മേള നടക്കുക.

വിദ്യാഭ്യാസ വകുപ്പ് മന്ത്രി പ്രൊഫ.സി.രവീന്ദ്രനാഥാണ് മേളയുടെ ഉദ്ഘാടനം നിർവ്വഹിച്ചത്. എം.എൽ.എ.മാരായ ആന്‍റണി ജോൺ, ജോൺ ഫെർണാണ്ടസ്, ജില്ലാ കളക്ടർ മുഹമ്മദ് വൈ. സഫീറുള്ള, ജില്ലാ ഇൻഫർമേഷൻ ഓഫീസർ നിജാസ് ജ്യൂവൽ എന്നിവർ സംസാരിച്ചു. സംഗീത സംവിധായകൻ അർജുനൻ മാസ്റ്ററെ ചടങ്ങിൽ ആദരിക്കുകയും ചെയ്തു.

മേള കഴിഞ്ഞ 2 വർഷത്തെ പിണറായി സർക്കാരിന്‍റെ ഭരണ മികവുകളുടേയും, നേട്ടങ്ങളുടേയും നേർസാക്ഷ്യമായാണ് സജ്ജമാക്കിയിരിക്കുന്നത്. മേളയിലെ പ്രദർശന നഗരിയിൽ വിവിധ വകുപ്പുകളെ പ്രതിനിധീകരിച്ച് 130 ഓളം സ്റ്റാളുകളുണ്ട്. ഭക്ഷ്യമേള, വിഷയാധിഷ്ഠിത സെമിനാറുകൾ, സാംസ്കാരിക സായാഹ്നം എന്നിവയും സജ്ജമാക്കിയിട്ടുണ്ട്.