ബഹുരാഷ്ട്ര കുത്തകകമ്പനികൾ വരട്ടേയെന്ന് ജയരാജൻ

കേരളത്തില്‍ വ്യവസായം തുടങ്ങാന്‍ ഏതു ബഹുരാഷ്ട്ര കുത്തക വന്നാലും സ്വീകരിക്കുമെന്നു വ്യവസായ മന്ത്രി ഇ.പി.ജയരാജന്‍. എന്നാല്‍ തുടങ്ങാനുദ്ദേശിക്കുന്ന വ്യവസായം സംസ്ഥാന താല്‍പര്യത്തിനും പ്രകൃതിക്കും അനുകൂലമാണോ എന്നു പരിശോധിച്ച ശേഷമേ അനുമതി നല്‍കൂ.ആരെയും അടച്ച്‌ ആക്ഷേപിക്കുന്നത് എല്‍ഡിഎഫ് സര്‍ക്കാരിന്റെ നയമല്ല. വ്യവസായം തുടങ്ങാന്‍ ആര്‍ക്കും ധൈര്യപൂര്‍വം കടന്നുവരാമെന്നും അതിന്റെ പേരില്‍ ആരും അഴിമതി നടത്താമെന്നു കരുതേണ്ടെന്നും ഇ.പി.ജയരാജന്‍ പറഞ്ഞു.

വ്യവസായ സംരംഭകര്‍ക്കു മെച്ചപ്പെട്ട അടിസ്ഥാനസൗകര്യങ്ങള്‍ ഉറപ്പുവരുത്തും. കേരളത്തിന്റെ വികസനത്തിനു കേന്ദ്ര സര്‍ക്കാര്‍ മുന്നോട്ടുവയ്ക്കുന്ന ഏതു സഹായവും സ്വീകരിക്കും. സ്ഥലം ലഭ്യമല്ലാത്തതിന്റെ പേരില്‍ സംസ്ഥാനത്തിന് ഒരു പദ്ധതിയും നഷ്ടപ്പെടില്ല. പൊതുമേഖലയെ തളര്‍ത്താതെ തന്നെ സ്വകാര്യമേഖലയുടെ പങ്കാളിത്തം ഉറപ്പുവരുത്തും. പ്രവാസി വ്യവസായികളെയും സംരംഭകരെയും പൂര്‍ണമായും സംരക്ഷിക്കും.

കണ്ണൂര്‍ രാജ്യാന്തര വിമാനത്താവളം 4000 മീറ്റര്‍ റണ്‍വേ നിര്‍മിച്ചു തന്നെ പ്രവര്‍ത്തന സജ്ജമാക്കും. സ്ഥലമേറ്റെടുപ്പിന്റെ പേരില്‍ പരിസരവാസികളെ ഭയപ്പെടുത്തി വിമാനത്താവളത്തെ അട്ടിമറിക്കാമെന്നു കരുതേണ്ടെന്നും ഇ.പി.ജയരാജന്‍ പറ‍ഞ്ഞു. കണ്ണൂര്‍ പ്രസ് ക്ലബ് സംഘടിപ്പിച്ച മുഖാമുഖം പരിപാടിയില്‍ പങ്കെടുക്കുകയായിരുന്നു ഇ.പി.ജയരാജന്‍.