കെ.കൃഷ‍്‍ണൻ കുട്ടി മന്ത്രിയായി സത്യപ്രതിജ്ഞ ചെയ്ത് അധികാരമേറ്റു

തിരുവനന്തപുരം: എൽ.ഡി.എഫ് മന്ത്രിസഭയിൽ ജെഡിഎസിന്‍റെ പുതിയ മന്ത്രിയായി കെ.കൃഷ‍്‍ണൻ കുട്ടി സത്യപ്രതിജ്ഞ ചെയ്ത് അധികാരമേറ്റു. ഗവർണർ പി.സദാശിവം സത്യവാചകം ചൊല്ലിക്കൊടുത്തു. സംസ്ഥാന ജലവിഭവ വകുപ്പ് മന്ത്രിയായാണ് കൃഷ‍്‍ണൻ കുട്ടി അധികാരമേൽക്കുന്നത്.

മാത്യു.ടി.തോമസിന് പകരമായാണ് അദ്ദേഹം മന്ത്രിയാവുന്നത്. വെള്ളിയാഴ്ച ബെംഗളൂരുവില്‍ ജെഡിഎസ് ദേശീയ അധ്യക്ഷന്‍ ദേവഗൗഡയുടെ നേതൃത്വത്തില്‍ നടന്ന ഉന്നതതല ചര്‍ച്ചയിലാണ് മാത്യു ടി തോമസിനെ മാറ്റി പകരം കെ കൃഷ്ണന്‍കുട്ടിയെ ജലവിഭവ വകുപ്പ് മന്ത്രിയാക്കാന്‍ പാര്‍ട്ടി തീരുമാനിച്ചത്.

കൃഷ്ണന്‍കുട്ടിയുടെ സത്യപ്രതിജ്ഞാ ചടങ്ങ് യുഡിഎഫ് ബഹിഷ്കരിച്ചു. ശബരിമല ഉൾപ്പെടെയുള്ള വിഷയങ്ങളിൽ സർക്കാരിനെതിരായ പ്രതിഷേധം അറിയിക്കുന്നതിനാണ് യുഡിഎഫ് ചടങ്ങ് ബഹിഷ്കരിച്ചത്.

ഇന്ന് പതിമൂന്നാം നിയമസഭാ സമ്മേളനം ആരംഭിച്ചു. അന്തരിച്ച മഞ്ചേശ്വരം എംഎല്‍എ പി ബി അബ്ദുള്‍ റസാഖിന് ചരമോപചാരം അര്‍പ്പിച്ച് സഭ പിരിഞ്ഞു. സമ്മേളനത്തില്‍ ജലവിഭവ വകുപ്പിനോടുള്ള ചോദ്യങ്ങള്‍ എത്തുന്നുണ്ട്.

ഇതോടെയാണ് സ്ഥാനമേറ്റെടുക്കണമെന്ന ധാരണയുടെ അടിസ്ഥാനത്തില്‍ ഇന്നു തന്നെ കൃഷ്ണന്‍ കുട്ടി സത്യപ്രതിജ്ഞ ചെയ്യുന്നത്. ഇതിന്‍റെ ഭാഗമായി ഇന്നലെ രാവിലെ മാത്യു ടി തോമസ് മുഖ്യമന്ത്രിക്ക് രാജി സമര്‍പ്പിച്ചിരുന്നു. ജനതാദള്‍ ദേശീയ നേതൃത്വത്തിന്‍റെ തീരുമാനത്തിന് പിന്നാലെയാണ് രാജിതീരുമാനം.