അമീറുള്ളിന് കോടതിവളപ്പിൽ കഞ്ചാവ് പൊതി കൈമാറ്റം

കൊച്ചി: പൊലീസ് കസ്റ്റഡി കാലാവധി അവസാനിച്ചതിനേത്തുടർന്ന്, കസ്റ്റഡികാലാവധി നീട്ടിക്കിട്ടുന്നതിലേയ്ക്കായി ജിഷ കൊലക്കേസ് പ്രതി അമീറുൾ ഇസ്ലാമിനെ കോടതിയിലെത്തിച്ചപ്പോൾ, പ്രതിക്ക് പൊതി കൈമാറാൻ ശ്രമിച്ചയാൾ പൊലീസ് പിടിയിലായി.

എറണാകുളം ജുഡിഷ്യൽ മജിസ്ട്രേറ്റ് കോടതിയിലാണ് സംഭവം. അമീറുളുമായെത്തിയ പൊലീസ് സംഘത്തിനിടയിലൂടെയാണ് ഇയാൾ പൊതി കൈമാറാൻ ശ്രമിച്ചത്. കയ്യോടെ പിടികൂടിയ പോലീസ്, ഇയാളെ ജീപ്പിൽ കയറ്റാൻ ശ്രമിച്ചെങ്കിലും ഇയാൾ വഴങ്ങിയില്ല. തുടർന്ന് ബലം പ്രയോഗിച്ചാണ് സ്റ്റേഷനിലേയ്ക്കു കൊണ്ടു പോയത്.

പൊതിയിൽ ലഹരിവസ്തുക്കളാണോ എന്നത് പരിശോധനയിലേ വ്യക്തമാകൂ. കഞ്ചാവ് ആണെന്നാണഅ നിഗമനം. അതേസമയം ജിഷ വധക്കേസുമായി പുതുതായി അറസ്റ്റിലായ ആൾക്ക് എന്തെങ്കിലും ബന്ധമുണ്ടെങ്കിൽ അത് കേസിനു പുതിയ വഴിത്തിരിവാകും. അമീറുൾ ഇസ്ലാമിന്റെ കസ്റ്റഡി കാലാവധി അടുത്ത മാസം പത്താം തീയതി വരെ നീട്ടി കോടതി ഉത്തരവായി.