ജിഷ കേസ്: പ്രതിയെ പിടികൂടിയ പോലീസിനെ അഭിനന്ദിച്ച് ചെന്നിത്തല

തിരുവനന്തപുരം: പെരുമ്പാവൂർ ജിഷ കൊലക്കേസ് പ്രതിയെ പിടികൂടിയ പൊലീസിനെ അഭിനന്ദിക്കുന്നുവെന്ന് പ്രതിപക്ഷ നേതാവ് രമേശ് ചെന്നിത്തല.
പൊലീസ് അന്വേഷണം തുടക്കം മുതൽ തന്നെ ശരിയായ ദിശയിലായിരുന്നു എന്ന് ഇതിലൂടെ ബോധ്യപ്പെട്ടുവെന്ന് ചെന്നിത്തല പറഞ്ഞു.

കഴിഞ്ഞ സര്‍ക്കാരിന്‍റെ കാലത്ത് മാധ്യമങ്ങള്‍ ഉന്നയിച്ച ആരോപണങ്ങളുടെ മുന ഒടിഞ്ഞു. കഴിഞ്ഞ സര്‍ക്കാരിന്‍റെ കാലത്ത് ഈ കേസ് തെളിയിക്കാന്‍ കഴിയാത്തതില്‍ വിഷമമുണ്ടെന്നും അദ്ദേഹം കൂട്ടിച്ചേർത്തു.

അസം സ്വദേശിയായ അമി ഉല്‍ ഇസ്‍ലാമിനെ പാലക്കാട് നിന്നാണ് പോലീസ് പിടികൂടിയത്. ഡിഎന്‍എ പരിശോധനാഫലത്തില്‍ നിന്നാണ് പ്രതി ഇയാൾ തന്നെയാണെന്ന് ഉറപ്പിച്ചത്. ഇയാളെ രഹസ്യ കേന്ദ്രത്തില്‍ ചോദ്യം ചെയ്തുവരികയാണ്. ഇയാളുടെ നാലു സുഹൃത്തുക്കളെയും പൊലീസ് കസ്റ്റഡിയില്‍ എടുത്തിട്ടുണ്ട്.