ജിഷ വധക്കേസ്: പ്രതിയെ 30വരെ കസ്റ്റഡിയിൽ വിട്ടു

കൊച്ചി: ജിഷ വധക്കേസിലെ പ്രതി അമിറുള്‍ ഇസ്‌ലാമിനെ കൂടുതൽ അന്വേഷണത്തിനായി പോലീസ് കസ്റ്റഡിയിൽ വിട്ടു. പ്രതിയെ വിട്ടുകിട്ടണമെന്ന് പോലീസ് കോടതിയിൽ അപേക്ഷിച്ചിരുന്നതിനെ തുടർന്നാണ് ജൂൺ 30 വൈകീട്ട് 4.30 വരെ കസ്റ്റഡിയിൽ വിട്ടത്.

എന്നാൽ പ്രതിയുടെ ചിത്രം പുറത്തുവിടരുതെന്ന് പോലീസ് മേധാവി നേരിട്ട് മാധ്യമങ്ങള്‍ക്ക് നിർദേശം നൽകിയിട്ടുണ്ട്. അവസാന സാക്ഷികളുടെ തിരിച്ചറിയൽ പരേഡ് കൂടെ കഴിഞ്ഞിട്ടേ പ്രതിയുടെ ചിത്രങ്ങള്‍ പുറത്തുവിടാവൂ എന്ന് പോലീസ് കോടതിയിൽ സമർപ്പിച്ച അപേക്ഷയിൽ പറയുന്നു.

കസ്റ്റഡി അപേക്ഷ പരിഗണിച്ച കോടതി പ്രതിയോട് എന്തെങ്കിലും പരാതിയുണ്ടോ എന്ന് അന്വേഷിച്ചപ്പോള്‍ ഇല്ല എന്നു പറഞ്ഞ അമിറുള്‍ തന്‍റെ നാട്ടില്‍ പോകണമെന്ന ആഗ്രഹം മാത്രമാണ് കോടതിയിൽ അറിയിച്ചത്. പോലീസ് കസ്റ്റഡിയിൽ വിടുന്നതിൽ എതിർപ്പില്ല എന്നു പറഞ്ഞ പ്രതി, പോലീസ് തന്നെ മർദ്ദിച്ചിട്ടില്ല എന്നും വ്യക്തമാക്കി.

പ്രതിയെ മറ്റു സംസ്ഥാനങ്ങളിൽ കൊണ്ടുപോയി തെളിവെടുപ്പ് നടത്താനാണ് പോലീസ് ഉദ്ദേശിക്കുന്നത്.ഇയാള്‍ വാടകക്കൊലയാളി ആണോ എന്നും പൊലീസ് പരിശോധിക്കുന്നുണ്ട്. അമിറുള്‍ ചോദ്യം ചെയ്യലിനോട് സഹകരിക്കുന്നുണ്ടെങ്കിലും പല മറുപടികളിലും വൈരുദ്ധ്യം പ്രകടമാകുന്നുണ്ടെന്നത് പോലീസിനെ കുഴക്കുന്നു.

ഇൗ സാഹചര്യത്തിൽ പുതിയ ദ്വിഭാഷിയുടെ സഹായത്തോടെയാണ് ഇന്ന് കോടതി ക്രമങ്ങള്‍ പൂർത്തിയാക്കിയത്.