ജിഷ വധക്കേസ്: പ്രതിയെ അമ്മയും സഹോദരിയും തിരിച്ചറിഞ്ഞില്ല

ജിഷ വധക്കേസ് പ്രതി അമീര്‍ ഉള്‍ ഇസ്ലാമിനെ ജിഷയുടെ അമ്മയും സഹോദരിയും തിരിച്ചറിഞ്ഞില്ല. ആലുവ പോലീസ് ക്ലബില്‍ നടന്ന തിരിച്ചറിയല്‍ പരേഡിലാണ് രാജേശ്വരിക്കും ദീപയ്ക്കും പ്രതിയെ തിരിച്ചറിയാന്‍ കഴിയാതെ പോയത്.

അമീര്‍ ഉള്‍ ഇസ്ലാം എന്നൊരാളെ അറിയില്ലെന്ന് ജിഷയുടെ അമ്മയും സഹോദരിയും നേരത്തെ അന്വേഷണ ഉദ്യോഗസ്ഥരോട് പറഞ്ഞിരുന്നു. പ്രതിയെ ഇവര്‍ക്ക് കണ്ടു പരിചയമെങ്കിലും ഉണ്ടോ എന്നുള്ളതായിരുന്നു ഇന്നത്തെ തിരിച്ചറിയല്‍ പരേഡില്‍ പോലീസ് പരിശോധിച്ചത്. എന്നാല്‍ പ്രതിയെ തിരിച്ചറിയാന്‍ ഇവര്‍ക്ക് സാധിച്ചില്ല.

തിരിച്ചറിയല്‍ പരേഡില്‍ പങ്കെടുക്കുന്നതിനായി ജിഷയുടെ അമ്മയേയും സഹോദരിയേയും ചൊവാഴ്ച രാവിലെയാണ് ആലുവ പോലീസ് ക്ലബിലേക്ക് കൊണ്ടു വന്നത്.