ജിഷ വധക്കേസില്‍ ക്വട്ടേഷന്‍ ഗുണ്ടയെ കസ്റ്റഡിയിലെടുത്തു

ജിഷ വധക്കേസില്‍ വാടകക്കൊലയാളിയുടെ സാധ്യത പൊലീസ് അന്വേഷിക്കുന്നു. ജില്ലയിലെ കുപ്രസിദ്ധ ക്വട്ടേഷന്‍ ഗുണ്ടകളിലൊരാളെ അന്വേഷണ സംഘം കസ്റ്റഡിയിലെടുത്തു. ജിഷ കൊല്ലപ്പെട്ട ഏപ്രില്‍ 28ന് ഇയാൾ പെരുമ്പാവൂര്‍ പട്ടണത്തിലുണ്ടായിരുന്നു. ഇയാളും കൂട്ടാളിയും അന്നു രാത്രി പട്ടണത്തിലൂടെ ഓട്ടോറിക്ഷയില്‍ സഞ്ചരിക്കുന്നതു ശ്രദ്ധിച്ച നാട്ടുകാരാണ് ഇക്കാര്യം പൊലീസിനെ അറിയിച്ചത്.

കൊലപാതകം അടക്കം പല ക്രിമിനല്‍ കേസുകളിലും പ്രതിയായ ഗുണ്ടയ്ക്ക് വലിയ രാഷ്ട്രീയ സ്വാധീനവുമുണ്ട്. കുറുപ്പംപടിക്കു സമീപത്തെ എന്‍ജിനീയറിങ് വര്‍ക്ഷോപ്പിലും ഗുണ്ടയും കൂട്ടാളിയും എത്തിയിരുന്നു. കൊല്ലപ്പെട്ട ജിഷയുമായി ഇയാള്‍ക്ക് എന്തെങ്കിലും പരിചയമുള്ളതായി അറിയില്ല. കൊലപാതകത്തില്‍ എന്തെങ്കിലും പങ്കുണ്ടോ എന്നറിയാനാണു ചോദ്യം ചെയ്യുന്നത്.