ജിഷ വധം: പ്രതിയെ ഇന്ന് കോടതിയില്‍ ഹാജരാക്കും

പെരുമ്പാവൂര്‍: ജിഷ വധക്കേസിലെ പ്രതി അമീറുല്‍ ഇസ്‌ലാമിനെ ഇന്ന് പെരുമ്പാവൂര്‍ ജുഡീഷ്യല്‍ മജിസ്ട്രേറ്റ് കോടതിയില്‍ ഹാജരാക്കും. വിശദമായ ചോദ്യംചെയ്യലിനും തെളിവുശേഖരിക്കലിനുമായി 15 ദിവസം പ്രതിയെ കസ്റ്റഡിയില്‍ വേണമെന്ന് പോലീസ് ആവശ്യപ്പെടുമെന്നാണ് സൂചന. പ്രതിയെ സ്ഥിരീകരിക്കുന്നതിനായി അനൗദ്യോഗികമായാണ് ഡിഎന്‍എ പരിശോധന നടത്തിയത്. ഔദ്യോഗിക അനുമതിയോടെ വീണ്ടും പരിശോധിക്കേണ്ടതുണ്ട്.

പ്രതിയെ കസ്റ്റഡിയില്‍ ലഭിച്ചതിനു ശേഷം തിരിച്ചറിയല്‍ പരേഡ് നടത്താനും പോലീസിന് നീക്കമുണ്ട്. അമീറുൽ ഇസ്‌ലാം താമസിച്ചിരുന്ന കെട്ടിടത്തില്‍ നിന്ന് കൊലയ്ക്ക് ഉപയോഗിച്ച കത്തിയും പ്രതി ആ സമയത്ത് ധരിച്ചിരുന്ന വസ്ത്രങ്ങളും കണ്ടെത്തിയിട്ടുണ്ട്. ജിഷയുടെ വീടിന് അരക്കിലോമീറ്റർ അകലത്തിലുള്ള കെട്ടിടത്തിലാണ് ഇയാള്‍ താമസിച്ചിരുന്നത്. പ്രതിയുടെ ബന്ധുവായ യുവാവിനെയും പൊലീസ് കസ്റ്റ‍ഡിയിലെടുത്തിട്ടുണ്ട്. അമീറുല്ലിന്റെ ഭാര്യയുടെ ആദ്യ ഭർത്താവിലുള്ള മകനാണ് ഈ യുവാവ്.
കോടതിയിലെത്തിക്കുമ്പോൾ കനത്ത ജനപ്രവാഹവും ജനരോഷവും ഉണ്ടാകുമെന്ന കണക്കു കൂട്ടലിൽ അതീവ സുരക്ഷയും ഏർപ്പെടുത്തിയിട്ടുണ്ട്.