ജിഷ: കൊല നടത്തിയത് അനാറെന്ന് അമീറിന്‍റെ സഹോദരൻ

പെരുമ്പാവൂര്‍: ജിഷയെ കൊലപ്പെടുത്തിയത് അമീറുൽ ഇസ്‌ലാമല്ലെന്ന് അമീറിന്‍റെ സഹോദരൻ ബദറുൽ ഇസ്‌ലാമിന്‍റെ വെളിപ്പെടുത്തൽ. സംഭവം നടക്കുമ്പോൾ അമീറിന്‍റെ ഒപ്പമുണ്ടായിരുന്ന സുഹൃത്തായ അനാറുൽ ഇസ്‌ലാമാണ് കൊല നടത്തിയതെന്നാണ് ബദര്‍ പോലീസിനോട് വെളിപ്പെടുത്തിയത്.

അനാറാണ് ജിഷയെ കൊലപ്പെടുത്തിയതെന്ന് അമീര്‍ നേരത്തെ തന്നെ തന്നോട് പറഞ്ഞിരുന്നതായി ബദർ വെളിപ്പെടുത്തി. കഴിഞ്ഞ ദിവസം ജയിലിൽ വെച്ച് കണ്ടപ്പോഴും അമീർ ഇത് ആവർത്തിച്ചെന്നും ബദർ പറയുന്നു. അനാറിനു ജിഷയുടെ കുടുംബത്തോട് മുൻവൈരാഗ്യമുണ്ടായിരുന്നെന്നും ജിഷയെയും കുടുംബത്തെയും അമീറിന് മുന്‍പരിചയമില്ലെന്നും ബദർ കൂട്ടിച്ചേർത്തു. എന്നാൽ അനാർ ഇപ്പോൾ എവിടെയാണുള്ളതെന്നു തനിക്ക് അറിയില്ലെന്നും ബദർ വ്യക്തമാക്കി.