ജിഷയുടെ സ്വപ്നഭവനം പിണറായി കൈമാറി

ജിഷയുടെ സ്വപ്നഭവനത്തിന്‍റെ താക്കോൽ മുഖ്യമന്ത്രി പിണറായി വിജയൻ അമ്മ രാജേശ്വരിക്ക് കൈമാറി. കൊല്ലപ്പെട്ട നിയമവിദ്യാര്‍ഥിനി ജിഷയുടെ കുടുംബത്തിനായി കലക്ടറുടെ നേതൃത്വത്തില്‍ നിര്‍മിതികേന്ദ്ര നിര്‍മിച്ച ‘ജിഷ ഭവനമാണ് മുഖ്യമന്ത്രി കൈമാറിയത്. ജിഷയുടെ അമ്മയുടെ ആഗ്രഹപ്രകാരമാണ് വീടിനു ജിഷ ഭവനം എന്ന പേരിട്ടത്.

മുടക്കുഴ തൃക്ക ആലിപ്പാടം കനാല്‍ ബണ്ട് റോഡരികിലാണ് പുതിയ വീട്. പട്ടികജാതി വിഭാഗത്തില്‍പ്പെട്ട ജിഷയ്ക്കു ബ്ലോക്ക് പഞ്ചായത്ത് വഴി ലഭിച്ച അഞ്ചു സെന്റ് സ്ഥലത്താണ് വീട്. മൂന്നു ലക്ഷം രൂപയായിരുന്നു വീടു നിര്‍മാണത്തിന് പഞ്ചായത്ത് അനുവദിച്ചത്. ജിഷ കൊല്ലപ്പെടുന്നതിനു മുന്‍പ് ഭിത്തി പണി ആരംഭിച്ചിരുന്നു. ജിഷ കൊല്ലപ്പെട്ടതിനു ശേഷം നിര്‍മാണം സര്‍ക്കാര്‍ ഏറ്റെടുക്കുകയായിരുന്നു.

ആദ്യം നിര്‍മിച്ച അടിത്തറ അശാസ്ത്രീയമായതിനാല്‍ പൊളിച്ചുനീക്കി പുതിയ അടിത്തറയിട്ടാണ് നിര്‍മാണം നടത്തിയത്. 44 ദിവസത്തിൽ 620 ചതുരശ്രയടി വിസ്തീര്‍ണമുള്ള, രണ്ടു കിടപ്പുമുറികളും അടുക്കളയും അടങ്ങുന്ന വീട് പൂര്‍ത്തിയാക്കി. ചുറ്റുമതില്‍ നിര്‍മിച്ച് സുരക്ഷിതമാക്കിയിട്ടുണ്ട്. നിര്‍മാണ സാമഗ്രികള്‍ ചിലര്‍ സൗജന്യമായി നല്‍കി. 11.50 ലക്ഷം രൂപയാണ് ഏകദേശ നിര്‍മാണച്ചെലവായത്.