ജിഷ്ണു കേസ്: ഒളിവില്‍പോയ പ്രതികള്‍ക്ക് മുന്‍കൂര്‍ ജാമ്യം

കൊച്ചി: എഞ്ചിനിയറിങ് വിദ്യാർഥിയായ ജിഷ്ണു പ്രണോയ് ആത്മഹത്യ ചെയ്ത കേസുമായി ബന്ധപ്പെട്ട് ഒളിവിൽ പോയ പ്രതികള്‍ക്ക് ഹൈക്കോടതി മുന്‍കൂർ ജാമ്യം അനുവദിച്ചു. അധ്യാപകരായ സി പി പ്രവീണ്‍, ഡിബിന്‍ എന്നിവര്‍ക്കാണ് മുന്‍കൂര്‍ ജാമ്യം അനുവദിച്ചത്.

കേസിലെ മറ്റു പ്രതികളായ കോളജ് വൈസ് പ്രിൻസിപ്പൾ എൻ കെ ശക്തിവേൽ, ചെയർമാൻ കൃഷ്ണദാസ്, സഞ്ജിത് വിശ്വനാഥൻ എന്നിവർക്ക് നേരത്തെ ജാമ്യം അനുവദിച്ചിരുന്നു. ഇതോടെ കേസിലെ അഞ്ചു പ്രതികൾക്കും ജാമ്യമായി.

ഇതിനിടെ, ജിഷ്ണു കേസിലെ സാക്ഷിമൊഴികൾ എല്ലാം കോടതി തള്ളി. കോളജ് പ്രിന്‍സിപ്പലിന്റെയും ജിഷ്ണുവിന്റെ സഹപാഠികളുടെയും മൊഴികളില്‍ വൈരുധ്യമുണ്ടെന്ന് ചൂണ്ടിക്കാട്ടിയാണ് കോടതി സാക്ഷിമൊഴികൾ തള്ളിയത്. അതിനാൽ പ്രതികളെ പൊലീസ് കസ്റ്റഡിയിൽ ചോദ്യം ചെയ്യേണ്ട ആവശ്യമില്ലെന്നും കോടതി നിരീക്ഷിച്ചു.

ജിഷ്ണു കേസിലെ അന്വേഷണം ശരിയായ ദിശയിലല്ലെന്നും കേരളത്തില്‍ ആരെയും ജയിലില്‍ അടയ്ക്കാവുന്ന സാഹചര്യമാണ് ഉള്ളതെന്നും കോടതി അഭിപ്രായപ്പെട്ടു. ജിഷ്ണു കേസുമായി ബന്ധപ്പെട്ട ഹര്‍ജികള്‍ ജസ്റ്റിസ് എബ്രഹാം മാത്യുവിന്റെ ബെഞ്ചാണ് ആദ്യം മുതല്‍ പരിഗണിക്കുന്നത്.

Jishnu Pranoy case; Accused gets bail

Jishnu Pranoy case; Accused teachers gets bail