ജോസ് കെ മാണി വിഭാഗം മുന്നണിയിൽ തിരിച്ചെത്തുമോ? നിലപാട് വ്യക്തമാക്കി യുഡിഎഫ് കണ്‍വീനര്‍

തിരുവനന്തപുരം: ജോസ് കെ മാണി വിഭാഗത്തെ മുന്നണിയിൽ തിരിച്ചെടുക്കുന്ന കാര്യം സംശയമാണെന്ന് യുഡിഎഫ് കൺവീനർ ബെന്നി ബെഹന്നാൻ. നിർണായക ഘട്ടങ്ങളിൽ ഒപ്പം നിൽക്കാതെ വഞ്ചന കാട്ടുന്ന ജോസ് വിഭാഗത്തിനെതിരെ കർശന നടപടി വേണമെന്ന് കെപിസിസി രാഷ്‌ട്രീയകാര്യ സമിതി വ്യക്തമാക്കി.

Also Read: ഫയലുകള്‍ കത്തിയെന്ന് എഫ്‌ഐആര്‍; മൊഴി നല്‍കിയത് അഡീഷനല്‍ പ്രോട്ടോകോള്‍ ഓഫീസര്‍, എഫ്‌ഐആറിൻ്റെ പകര്‍പ്പ് സമയം മലയാളത്തിന്

പിണറായി വിജയൻ സർക്കാരിനെതിരെ പ്രതിപക്ഷം കൊണ്ടുവന്ന അവിശ്വാസ പ്രമേയത്തിൽ നിന്ന് ജോസ് കെ മാണി വിഭാഗം വിട്ടു നിന്നിരുന്നു. ഇത് ഇടതുമുന്നണി പ്രതിപക്ഷത്തിനെതിരെയും യുഡിഎഫിനെതിരെയും ആയുധമാക്കുകയും ചെയ്‌തു. ഈ സാഹചര്യത്തിലാണ് ജൊസ് കെ മാണി വിഭാഗത്തിനെതിരെ കർശന നടപടികൾ തുടരണാമെന്ന വികാരം രാഷ്‌ട്രീയകാര്യ സമിതിയിൽ ഉയർന്നു വന്നത്.

ജോസ് കെ മാണി വിഭാഗവുമായി ചർച്ചകൾ തുടരണമെന്നും പ്രശ്‌നങ്ങൾ ചർച്ചയിലൂടെ പരിഹരിക്കണമെന്നും ആവശ്യപ്പെട്ട ഉമ്മൻ ചാണ്ടി വിഭാഗമാണ് ഇപ്പോൾ എതിർപ്പ് ശക്തമാക്കുന്നത്. വൈകാതെ കടുത്ത നിലപാട് സ്വീകരിക്കണമെന്ന ആവശ്യമാണ് ഉമ്മൻ ചാണ്ടി വിഭാഗം ഉന്നയിക്കുന്നത്. മുന്നണിയിൽ എതിർപ്പ് ശക്തമായതോടെ അടുത്ത യുഡിഎഫ് യോഗം ആവശ്യം പരിഗണിക്കുമെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രന്‍ വ്യക്തമാക്കി.

Also Read: സഭാ സമ്മേളനത്തിനെത്തിയ ലീഗ്, കോൺഗ്രസ് എംഎൽഎമാർ മടങ്ങാത്തത് ദുരൂഹം; 8 കാര്യങ്ങൾ ചൂണ്ടിക്കാട്ടി ഇപി ജയരാജൻ

മുസ്ലീം ലീഗ് അടക്കമുള്ള പാർട്ടികളുടെ നിലപാടറിഞ്ഞ ശേഷമായിരിക്കും ജോസ് വിഭാഗത്തിനെതിരെയുണ്ടാകുക. ജോസ് - ജോസഫ് വിഭാഗങ്ങളെ ഒരുമിച്ച് നിർത്താൻ കഴിയില്ലെന്ന വികാരം യുഡിഎഫിൽ ശക്തമാണ്. എന്നാൽ ഉമ്മൻ ചാണ്ടി വിഭാഗത്തിൻ്റെ എതിർപ്പ് മൂലം ഇക്കാര്യം വ്യക്തമാക്കാൻ പലരും മടിച്ചു. എന്നാൽ അവിശ്വാസപ്രമേയത്തില്‍ നിന്ന് ജോസ് വിഭാഗം വിട്ട് നിന്നതോടെ സാഹചര്യങ്ങൾ ജോസ് വിഭാഗത്തിന് അനുകൂലമായി. പിന്നാലെ രാഷ്‌ട്രീയകാര്യ സമിതി നിലപാട് വ്യക്തമാക്കുകയും ചെയ്‌തു.