നിഷയുടെ പരാമർശം വിവാദമാക്കേണ്ടെന്ന് ജോസ് കെ.മാണി

കോട്ടയം: നിഷ ജോസ് കെ.മാണി 'ദി അദർ സൈഡ് ഓഫ് ലൈഫ്' എന്ന പുസ്തകത്തിലൂടെ രാഷ്ട്രീയ നേതാവിന്‍റെ മകനെതിരെ നടത്തിയ പരാമർശം വിവാദമാക്കേണ്ടെന്ന് ഭർത്താവ് ജോസ് കെ.മാണി. രാഷ്ട്രീയ കുടുംബത്തിലെ സംഭവവികാസങ്ങളാണ് നിഷ പുസ്തകത്തിൽ എഴുതിയിരിക്കുന്നത്. അപമാനിച്ചയാളുടെ പേര് വെളിപ്പെടുത്തുന്നത് തികച്ചും വ്യക്തിപരമാണെന്ന് ജോസ് കെ.മാണി പ്രതികരിച്ചു.

ഒരു ട്രെയിൻ യാത്രയിൽ പ്രമുഖ രാഷ്ട്രീയ നേതാവിന്‍റെ മകൻ തന്നെ അപമാനിച്ചുവെന്ന് നിഷ എഴുതിയിരുന്നു. എന്നാൽ നേതാവിന്‍റെ മകന്‍റെ പേര് അതിൽ വെളിപ്പെടുത്തിയിരുന്നില്ല. നിഷ പുസ്തകത്തിലൂടെ നടത്തിയ പരാമർശത്തിനെതിരെ പി.സി ജോർജ് ഇന്നലെ രംഗത്ത് വന്നിരുന്നു. തന്‍റെ മകന്‍ ഷോണ്‍ ജോര്‍ജിന്‍റെ രാഷ്ട്രീയ ഭാവി തകർക്കാനുള്ള ശ്രമമാണ് പരാമർശത്തിന് പിന്നിലെന്ന് ജോർജ് ആരോപിച്ചു. പുസ്തകം വിറ്റു പോകുന്നതിനുള്ള കച്ചവടതന്ത്രമാണ് ഇത്തരം പരാമർശത്തിന് പിന്നിലെന്നും ജോർജ് പറഞ്ഞിരുന്നു.