ജോസ് കെ മാണി രാജ്യസഭ സ്ഥാനാര്‍ഥിയാകും

കൊച്ചി: യുഡിഎഫിന്‍റെ രാജ്യസഭ സ്ഥാനാര്‍ഥിയായി ജോസ് കെ മാണിയെ, കേരള കോണ്‍ഗ്രസ് തെരഞ്ഞെടുത്തതായി റിപ്പോര്‍ട്ടുകള്‍. ഔദ്യോഗിക പ്രഖ്യാപനം ആയിട്ടില്ല.

രാജ്യസഭ സീറ്റ് കേരള കോണ്‍ഗ്രസ് മാണി വിഭാഗത്തിന് നല്‍കിയതിലുള്ള പ്രതിഷേധങ്ങള്‍ കോണ്‍ഗ്രസില്‍ പുകയുന്നതിന് ഇടയിലാണ് സ്ഥാനാര്‍ഥിയായി ജോസ് കെ മാണിയെ പ്രഖ്യാപിച്ചത്. മത്സരത്തിന് ഇല്ലെന്ന് കെ.എം മാണി ആദ്യമെ വ്യക്തമാക്കിയിരുന്നു. മാണി മത്സരിച്ചില്ലെങ്കില്‍ ജോസ് കെ മാണിക്ക് അവസരം നല്‍കണമെന്ന് അഭിപ്രായം പാര്‍ട്ടിയില്‍ ഉണ്ടായിരുന്നു. ഇക്കാര്യത്തില്‍ മാണി കൃത്യമായ നിലപാട് എടുക്കാത്തതിനെ തുടര്‍ന്ന് പി.ജെ ജോസഫ് വിഭാഗം അതൃപ്‍തി ഉയര്‍ത്തിയിരുന്നു.

കോണ്‍ഗ്രസിന് അവകാശപ്പെട്ട രാജ്യസഭ സീറ്റ് കേരള കോണ്‍ഗ്രസിന് വിട്ടു നല്‍കിയതില്‍ നേതാക്കള്‍ക്കും അണികള്‍ക്കും ഇടയില്‍ പ്രതിഷേധം ശക്തമാണ്. തീരുമാനം എടുത്ത ഉമ്മന്‍ ചാണ്ടിയുടെ കോലം പ്രവര്‍ത്തകര്‍ കത്തിച്ചിരുന്നു. മുന്നണി സംവിധാനം ശക്തമാക്കാനുള്ള താല്‍ക്കാലിക വിട്ടുവീഴ്‍ച്ച മാത്രമാണ് സീറ്റ് വിഭജനം എന്നാണ് ഉമ്മന്‍ ചാണ്ടിയുടെ പ്രതികരണം. ഇത് മുതിര്‍ന്ന നേതാക്കള്‍ പോലും അംഗീകരിക്കാന്‍ വിസമ്മതിക്കുകയാണ്