കോട്ടയത്ത് മാധ്യമപ്രവര്‍ത്തക വാഹനാപകടത്തിൽ മരിച്ചു

അയര്‍ക്കുന്നം: ബന്ധുവിനോടൊപ്പം സ്കൂട്ടറിൽ സഞ്ചരിക്കുകയായിരുന്ന മാധ്യമപ്രവര്‍ത്തക സ്കൂട്ടറിനു പിന്നിൽ വാൻ ഇടിച്ചു മരിച്ചു. സ്റ്റാര്‍ വിഷൻ ചാനലിൽ വാര്‍ത്താ അവതാരകയും കിടങ്ങൂര്‍ കുളങ്ങരമുറിയിൽ പരേതനായ കെ ഇ വാസുദേവൻ്റെ മകളുമായ സൂര്യ(29)യാണ് മരിച്ചത്. ഇടിച്ച വാഹനം നിര്‍ത്താതെ പോയി.

ഇന്നലെ രാത്രി ഏഴിന് അയര്‍ക്കുന്നം തിരുവഞ്ചൂര്‍ റോഡിൽ ചപ്പാത്ത് നിഷ്കളങ്ക ജംഗ്ഷനിലായിരുന്നു അപകടം. നീറിക്കാട്ടുള്ള ബന്ധുവീട്ടിൽ പോയ ശേഷം ബന്ധുവായ അനന്തപത്മനാഭനൊപ്പം വീട്ടിലേയ്ക്ക് പോകുകയായിരുന്നു സൂര്യ. അപകടത്തെത്തുടര്‍ന്ന് തെറിച്ചുവീണ സൂര്യയെ നാട്ടുകാര്‍ കോട്ടയം മെഡിക്കൽ കോളേജ് ആശുപത്രിയിലെത്തിച്ചെങ്കിലും മരിച്ചു. അനന്തപത്മനാഭന് നിസാര പരിക്കേറ്റു.

സൂര്യയുടെ പിതാവ് സിപിഎം അയർക്കുന്നം ഏരിയാ കമ്മിറ്റി അംഗമായിരുന്ന വാസുദേവൻ അഞ്ചു മാസം മുൻപാണു മരിച്ചത്. അമ്മ: സുശീല. സഹോദരി: സൗമ്യ. സൂര്യയുടെ മൃതദേഹം മെഡിക്കൽകോളജ് ആശുപത്രി മോർച്ചറിയിൽ. സംസ്കാരം ഇന്നു മൂന്നിനു വീട്ടുവളപ്പിൽ.