ജഡ്ജി നിയമനം കുടുംബകാര്യമല്ലെന്ന് ജസ്റ്റിസ് കെമാല്‍ പാഷ

കൊച്ചി: ജഡ്ജി നിയമനം കുടുംബകാര്യമല്ലെന്ന് ജസ്റ്റിസ് കെമാല്‍ പാഷ. ഹൈക്കോടതിയില്‍ നിന്ന് വിരമിക്കുന്ന ജസ്റ്റീസ് കെമാല്‍ പാഷ തന്റെ വിടവാങ്ങല്‍ ചടങ്ങിലാണ് ജുഡീഷ്യറിക്കെതിരേ ആഞ്ഞടിച്ചത്. നിയമനം കുടുംബ സ്വത്ത് പോലെ വീതിച്ചു നല്‍കാനുള്ളതല്ല. മാധ്യമങ്ങളില്‍ വരുന്ന വാര്‍ത്തകള്‍ ശരിയാണെങ്കില്‍ ഇപ്പോള്‍ പരിഗണിക്കുന്ന പേരുകളില്‍ ചിലര്‍ ആ സ്ഥാനത്തിന് അര്‍ഹരല്ല.

സമകാലിക സംഭവങ്ങള്‍ ജുഡീഷ്യരെയുടെ അന്തസ്സ് കളഞ്ഞു. വിരമിച്ചതിനു ശേഷം സര്‍ക്കാര്‍ നല്‍കുന്ന പദവികള്‍ ഏറ്റെടുക്കാതിരിക്കുന്നതാണ് ഉചിതം. ചുരുങ്ങിയത് മൂന്ന് വര്‍ഷമെങ്കിലും പദവികള്‍ ഏറ്റെടുക്കാതിരിക്കുന്നതാണ് ഉചിതം എന്നും ജ. കെമാല്‍ പാഷ പറഞ്ഞു.ജഡ്ജിമാരുടെ നിയമനം എതെങ്കിലും ജാതിക്കോ മതത്തിനോ പതിച്ചു നൽകേണ്ടതില്ലെന്നും ചില ബാഹ്യശക്തികൾ വിധിന്യായത്തിൽ ഇടപെടാൻ ശ്രമിക്കുന്നതായും ജസ്റ്റീസ് കെമാല്‍ പാഷ പറഞ്ഞു.കൊല്ലം അഞ്ചല്‍ സ്വദേശിയായ ജസ്റ്റീസ് കെമാല്‍ പാഷ തിരുവനന്തപുരം ലോ കോളെജ്, കോട്ടയം എംജി യൂണിവേഴ്‌സിറ്റി എന്നിവിടങ്ങളില്‍ നിന്നാണ് നിയമവിദ്യാഭ്യാസം പൂര്‍ത്തിയാക്കിയത്. 2013 ജനുവരിയില്‍ ഹൈക്കോടതിയില്‍ അഡീഷണല്‍ ജഡ്ജിയായി നിയമിതനായ അദ്ദേഹം അടുത്തവര്‍ഷം ജൂണില്‍ ഹൈക്കോടതിയിലെ സ്ഥിരം ജഡ്ജിയായി നിയമിതനാകുകയായിരുന്നു. തല ഉയര്‍ത്തിപ്പിടിച്ചു തന്നെയാണ് താന്‍ വിരമിക്കുന്നതെന്നു പറഞ്ഞുകൊണ്ടാണ് കെമാല്‍ പാഷ പ്രസംഗം അവസാനിപ്പിച്ചത്.