കെ കൃഷ്ണന്‍കുട്ടി നാളെ സത്യപ്രതിജ്ഞ ചെയ്ത് അധികാരമേല്‍ക്കും

തിരുവനന്തപുരം: ജെഡിഎസിന്‍റെ പുതിയ മന്ത്രിയായി മുതിര്‍ന്ന നേതാവ് കെ കൃഷ്ണന്‍കുട്ടി നാളെ സത്യപ്രതിജ്ഞ ചെയ്ത് അധികാരമേല്‍ക്കും. വൈകീട്ട് അഞ്ച് മണിക്ക് രാജ്ഭവനിലാണ് സത്യപ്രതിജ്ഞാ ചടങ്ങുകള്‍ നടക്കുക. വെള്ളിയാഴ്ച ബെംഗളൂരുവില്‍ ദേശീയ അധ്യക്ഷന്‍ ദേവഗൗഡയുടെ നേതൃത്വത്തില്‍ നടന്ന ഉന്നതതല ചര്‍ച്ചയിലാണ് മാത്യു ടി തോമസിനെ മാറ്റി പകരം കെ കൃഷ്ണന്‍കുട്ടിയെ ജലവിഭവ വകുപ്പ് മന്ത്രിയാക്കാന്‍ പാര്‍ട്ടി തീരുമാനിച്ചത്.

ചൊവ്വാഴ്ച നടക്കുന്ന നിയമസഭാ സമ്മേളനത്തില്‍ ജലവിഭവ വകുപ്പിനോടുള്ള ചോദ്യങ്ങള്‍ നിയമസഭയില്‍ എത്തുന്നുണ്ട്. ഇതിന് മുമ്പ് ഇതിന് മുമ്പ് ജലവിഭവ വകുപ്പ് മന്ത്രി സ്ഥാനമേറ്റെടുക്കണമെന്ന ധാരണയുടെ അടിസ്ഥാനത്തിലാണ് നാളെ തന്നെ കൃഷ്ണന്‍ കുട്ടി സത്യപ്രതിജ്ഞ ചെയ്യുന്നത്. ഇതിന്‍റെ ഭാഗമായി തിങ്കളാഴ്ച രാവിലെ മാത്യു ടി തോമസ് മുഖ്യമന്ത്രിക്ക് രാജി സമര്‍പ്പിച്ചിരുന്നു. ജനതാദള്‍ ദേശീയ നേതൃത്വത്തിന്‍റെ തീരുമാനത്തിന് പിന്നാലെയാണ് രാജിതീരുമാനം.