കെ.കൃഷ്ണന്‍കുട്ടിയുടെ സത്യപ്രതിജ്ഞ ഇന്ന്

തിരുവനന്തപുരം: ജെഡിഎസിന്‍റെ പുതിയ മന്ത്രിയായി മുതിര്‍ന്ന നേതാവ് കെ കൃഷ്ണന്‍കുട്ടി ഇന്ന് സത്യപ്രതിജ്ഞ ചെയ്ത് അധികാരമേല്‍ക്കും. വൈകീട്ട് അഞ്ച് മണിക്ക് രാജ്ഭവനിലാണ് സത്യപ്രതിജ്ഞാ ചടങ്ങുകള്‍ നടക്കുക. വെള്ളിയാഴ്ച ബെംഗളൂരുവില്‍ ദേശീയ അധ്യക്ഷന്‍ ദേവഗൗഡയുടെ നേതൃത്വത്തില്‍ നടന്ന ഉന്നതതല ചര്‍ച്ചയിലാണ് മാത്യു ടി തോമസിനെ മാറ്റി പകരം കെ കൃഷ്ണന്‍കുട്ടിയെ ജലവിഭവ വകുപ്പ് മന്ത്രിയാക്കാന്‍ പാര്‍ട്ടി തീരുമാനിച്ചത്.

ഇന്ന് പതിമൂന്നാം നിയമസഭാ സമ്മേളനം ആരംഭിച്ചു. അന്തരിച്ച മഞ്ചേശ്വരം എംഎല്‍എ പി ബി അബ്ദുള്‍ റസാഖിന് ചരമോപചാരം അര്‍പ്പിച്ച് സഭ പിരിഞ്ഞു. സമ്മേളനത്തില്‍ ജലവിഭവ വകുപ്പിനോടുള്ള ചോദ്യങ്ങള്‍ എത്തുന്നുണ്ട്. ഇതോടെയാണ് സ്ഥാനമേറ്റെടുക്കണമെന്ന ധാരണയുടെ അടിസ്ഥാനത്തില്‍ ഇന്നു തന്നെ കൃഷ്ണന്‍ കുട്ടി സത്യപ്രതിജ്ഞ ചെയ്യുന്നത്. ഇതിന്‍റെ ഭാഗമായി ഇന്നലെ രാവിലെ മാത്യു ടി തോമസ് മുഖ്യമന്ത്രിക്ക് രാജി സമര്‍പ്പിച്ചിരുന്നു. ജനതാദള്‍ ദേശീയ നേതൃത്വത്തിന്‍റെ തീരുമാനത്തിന് പിന്നാലെയാണ് രാജിതീരുമാനം.

അതേസമയം സത്യപ്രതിജ്ഞ ചടങ്ങില്‍ നിന്ന് യു‍ഡിഎഫ് വിട്ടു നില്‍ക്കുമെന്ന് അറിയിച്ചിട്ടുണ്ട്.