മാണി അഴിമതിക്കാരൻ തന്നെയെന്ന് സുധാകര്‍ റെഡ്ഡി

മലപ്പുറം: കേരള കോൺഗ്രസ് എമ്മിനെ മുന്നണിയിലേയ്ക്ക് സ്വീകരിക്കാൻ തയ്യാറെടുക്കുന്ന സിപിഎമ്മിനു പുതിയ തലവേദന സൃഷ്ടിച്ച് വിഷയത്തിൽ എതിര്‍പ്പുമായി സിപിഐ ദേശീയ നേതൃത്വം. മുൻ ധനമന്ത്രിയായ കെ എം മാണി അഴിമതിക്കാരൻ തന്നെയാണെന്ന് സിപിഐ ജനറൽ സെക്രട്ടറി സുധാകര്‍ റെഡ്ഡി പറഞ്ഞു.

കോൺഗ്രസിനോളം അഴിമതിക്കാരല്ല കേരള കോൺഗ്രസെന്ന കോടിയേരി ബാലകൃഷ്ണന്‍റെ പ്രസ്താവനയോട് പ്രതികരിക്കുകയായിരുന്നു അദ്ദേഹം. അഴിമതിയ്ക്ക് വലുപ്പച്ചെറുപ്പമില്ലെന്ന് സുധാകര്‍ റെഡ്ഡി പറഞ്ഞു. അതേസമയം പ്രാദേശികതലത്തിൽ കോൺഗ്രസുമായി സഖ്യങ്ങളാകാം എന്ന സിപിഐ നിലപാടും റെഡ്ഡി ഓര്‍മിപ്പിച്ചു. ബിജെപിയാണ് മുഖ്യശത്രു. കേരളത്തിൽ ജെഡിയുവിനെ ഉള്‍പ്പെടുത്തി എൽഡിഎഫ് വിപുലീകരിക്കണമെന്നും അദ്ദേഹം ആവശ്യപ്പെട്ടു.