മുഖ്യമന്ത്രി ആചാരങ്ങളെ ദുരാചാരങ്ങളായി മാറ്റുകയാണെന്ന് കെ മുരളീധരന്‍

തിരുവനന്തപുരം: ശബരിമല വിഷയത്തില്‍ ആചാരങ്ങളെ ദുരാചാരങ്ങളായി മുഖ്യമന്ത്രി മാറ്റുകയാണെന്ന് കെ മുരളീധരന്‍ എംഎല്‍എ. വിഷയത്തില്‍ അനാവശ്യ കുപ്രചാരണങ്ങളാണ് മുഖ്യമന്ത്രി നടത്തുന്നതെന്നും അദ്ദേഹം ആരോപിച്ചു. ശബരിമലയില്‍ വിശ്വാസം സംരക്ഷിക്കുക, വര്‍ഗീയതയെ തുരത്തുക എന്ന മുദ്രാവാക്യം ഉയര്‍ത്തിയുള്ള പ്രചാരണ യാത്രക്കു തുടക്കം കുറിച്ച് സംസാരിക്കുകയായിരുന്നു കെ മുരളീധരന്‍.

പകല്‍ മുഖ്യമന്ത്രി കമ്മ്യൂണിസം പ്രചരിപ്പിക്കുകയും രാത്രി ആര്‍എസ്‍എസുമായി കൂട്ടുചേരുകയാണ്. വത്സല്‍ തില്ലങ്കേരിയെ നിയന്ത്രിക്കാന്‍ കഴിയാത്ത മുഖ്യമന്ത്രി എങ്ങനെയാണ് ന്യൂനപക്ഷങ്ങളെ സംരക്ഷിക്കുന്നതെന്നും മുരളീധരന്‍ ചോദിച്ചു.

പാളയം മുതല്‍ പത്തനംതിട്ടവരെയാണ് കെ മുരളീധരന്‍ നയിക്കുന്ന പ്രചാരണ യാത്ര. പദയാത്ര 14 ന് പത്തനംതിട്ടയില്‍ എത്തും. 15 ന് വിവിധ ജില്ലകളില്‍ നിന്നുള്ള പദയാത്രകള്‍ പത്തനംതിട്ടയില്‍ സംഗമിക്കും.