വിശ്വാസികൾക്കൊപ്പം നിന്നില്ലെങ്കിൽ പാർടി നശിക്കുമെന്ന് കെ സുധാകരൻ

കാസർകോഡ്: ശബരിമല വിഷയത്തിൽ വിശ്വാസികൾക്കൊപ്പം നിന്നില്ലെങ്കിൽ പാർടി നശിക്കുമെന്ന് കെപിസിസി വർക്കിങ് പ്രസിഡന്റ് കെ സുധാകരൻ. വിശ്വാസികൾക്കൊപ്പം നിന്നെല്ലെങ്കിൽ വരുന്ന തെരഞ്ഞെടുപ്പിൽ കേരളത്തിലെ കോൺഗ്രസ് വാട്ടർ ലൂ ആകുമെന്നും അദ്ദേഹം അഭിപ്രായപ്പെട്ടു. ശബരിമലയിൽ നേട്ടം ഉണ്ടാക്കാൻ ബിജെപിയെ അനുവദിക്കരുതെന്നും സുധാകരൻ പറഞ്ഞു.

ഭക്തജനങ്ങളുടെ കൂടെ നിന്നില്ലെങ്കിൽ കോൺഗ്രസിന്റെ അടിവേരറുക്കുന്നത് കാണേണ്ടിവരും. കാസർകോട്ടെ പരിപാടിയിൽ സംസാരിക്കുകയായിരുന്നു സുധാകരൻ.

സ്ത്രീകളും പുരുഷന്മാരും തുല്ല്യരാണ്. അവർക്ക് എവിടെയും പോകാൻ അനുമിതിയുണ്ടെന്ന രാഹുൽ ഗാന്ധിയുടെ പ്രസ്താവനയ്ക്ക് മറുപടി പറയുകയായിരുന്നു കെ സുധാകരൻ. അഖിലേന്ത്യാ കോൺഗ്രസ് കമ്മിറ്റിയും രാഹുലിന്റെ പ്രസ്താവനയെ പിന്തുണച്ചു.

ശബരിമല വിഷയത്തിൽ കേരളത്തിലെ കോൺഗ്രസ് പാർടിയും യുഡിഎഫും വിശ്വാസികൾക്കൊപ്പമാണെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. രാഹുൽ ഗാന്ധിയുടേത് വ്യക്തിപരമായ അഭിപ്രായമാണെന്നും പ്രവർത്തകർക്ക് ആശയക്കുഴപ്പം വേണ്ടെന്നും ചെന്നിത്തല പ്രതികരിച്ചു.

ശബരിമല വിഷയത്തിൽ സത്യവാങ്മൂലം നൽകിയതുമുതൽ കോൺഗ്രസിന് ഒരു അഭിപ്രായം മാത്രമേയുള്ളൂവെന്നും ചെന്നിത്തല വ്യക്തമാക്കി. രാഹുൽ ഗാന്ധിക്ക് വ്യക്തിപരമായ അഭിപ്രായം ഉണ്ടെങ്കിലും കേരള ഘടകത്തെ വിശ്വാസികൾക്കൊപ്പം നിൽക്കാൻ അനുവദിച്ചത് അദ്ദേഹത്തിന്റെ മഹത്വമാണെന്നും ചെന്നിത്തല കൂട്ടിച്ചേർത്തു.