പിണറായി വിജയൻ നികൃഷ്ടനും നീചനുമായ മുഖ്യമന്ത്രി: കെ സുരേന്ദ്രൻ

കോഴിക്കോട്: ശബരിമലയിൽ യുവതികൾ പ്രവേശിച്ചുവെന്ന് കാണിച്ച് സർക്കാർ സുപ്രീം കോടതിയിൽ സമർപ്പിച്ചത് കള്ള റിപ്പോർട്ടെന്ന് ബിജെപി നേതാവ് കെ.സുരേന്ദ്രൻ. 51 യുവതികൾ ശബരിമലയിൽ പ്രവേശിച്ചുവെന്നാണ് സർക്കാർ സമർപ്പിച്ച രേഖ. സുപ്രീം കോടതിയെ തെറ്റിദ്ധരിപ്പിച്ചു ഡിജിപിക്കെതിരെ കോടതിയലക്ഷ്യത്തിന് കേസെടുക്കണമെന്നും കെ.സുരേന്ദ്രൻ ആവശ്യപ്പെട്ടു.

നീചനും നികൃഷ്ടനുമായ മുഖ്യമന്ത്രിയാണ് പിണറായി വിജയൻ. കോടതിയിൽ ഇങ്ങനെയൊരു രേഖ സമർപ്പിച്ചതോടെ അത് വ്യക്തമായെന്നും കെ.സുരേന്ദ്രൻ കൂട്ടിച്ചേർത്തു. ശബരിമല നിലനിൽക്കരുതെന്ന ചിന്തയാണ് സർക്കാരിന് ഉള്ളതെന്നും ഫേസ്ബുക് പോസ്റ്റിൽ കെ.സുരേന്ദ്രൻ കുറിച്ചു. ഈ റിപ്പോർട്ടിലോട്ട് പുനഃപരിശോധനാ ഹർജി അട്ടിമറിക്കാനും സർക്കാർ ശ്രമിക്കുന്നുണ്ടെന്ന് കെ.സുരേന്ദ്രൻ ആരോപിച്ചു.

പോസ്റ്റിന്റെ പൂർണ രൂപം: ശബരിമല സുപ്രീംകോടതി റിവ്യൂ പെറ്റീഷൻ അട്ടിമറിക്കാനും ശബരിമലയെ തകർക്കാനുമുള്ള കള്ള റിപ്പോർട്ടാണിത്.കള്ള റിപ്പോർട്ട് നൽകി സുപ്രീംകോടതിയെ തെറ്റിദ്ധരിപ്പിച്ച ഡി. ജി. പി യ്ക്കെതിരെ കൺട്ംപ്റ്റ് ഓഫ് കോർട്ടിന് കേസ്സെടുക്കണം. പിണറായി വിജയൻ നീചനും നികൃഷ്ടനുമായ മുഖ്യമന്ത്രിയാണെന്ന് ഈ നടപടിയിലൂടെ ഒരിക്കൽക്കൂടി തെളിഞ്ഞിരിക്കുന്നു. ഒരു തരത്തിലും ശബരിമലയെ നിലനിൽക്കാൻ അനുവദിക്കില്ലെന്ന സർക്കാരിന്റെ നിലപാടാണ് ഇതു തെളിയിക്കുന്നത്.