സുരേന്ദ്രനെ ബിജെപി സംസ്ഥാന അധ്യക്ഷ പദവിയിലേക്ക് പരിഗണിച്ചേക്കും

പത്തനംതിട്ട: ഓഗസ്റ്റിൽ നടക്കുന്ന സംഘടനാ തെരഞ്ഞെടുപ്പിൽ കെ.സുരേന്ദ്രനെ സംസ്ഥാന ബിജെപി അധ്യക്ഷനാക്കാൻ നീക്കം നടക്കുന്നതായി സൂചന. സജീവ അംഗത്വ വിതരണം ഓഗസ്റ്റിൽ പൂർത്തിയാകും. ഇതിന് ശേഷം സംഘടനാ തെരഞ്ഞെടുപ്പ് നടക്കും. മുരളീധരപക്ഷമാണ് കെ.സുരേന്ദ്രന് വേണ്ടി ശക്തമായ നീക്കങ്ങൾ നടത്തുന്നത്.

പാർട്ടിക്ക് കേരളത്തിൽ വലിയ തോൽവി നേരിട്ട സാഹചര്യത്തിൽ പരമ്പരാഗത നേതാക്കളെ പരിഗണിക്കുന്നത് അവസാനിപ്പിക്കണമെന്ന വാദവും ഉയരുന്നുണ്ട്. പി.കെ കൃഷ്ണദാസ് വിഭാഗം എം.ടി രമേശിനായും പി.എസ് ശ്രീധരൻപിള്ളക്ക് വേണ്ടി വാദിക്കുന്നവർ കെ.പി ശ്രീശനെ നേതൃസ്ഥാനത്തേക്ക് കൊണ്ട് വരണമെന്ന് പറയുന്നുണ്ടെങ്കിലും കേന്ദ്രനേതൃത്വം ഈ നീക്കങ്ങളോടൊന്നും പ്രതികരിച്ചിട്ടില്ല.

പാർട്ടിയിൽ കടുത്ത ഗ്രൂപ്പിസം ഉള്ളതിനാൽ തന്നെയാണ് പുതിയ ഒരാളിനെ പ്രസിഡന്റായി കൊണ്ട് വരാൻ കേന്ദ്ര നേതൃത്വം ശ്രമിക്കുന്നത്. പത്തനംതിട്ടയിൽ ഒരു ലക്ഷത്തോളം വോട്ടുകൾ കൂടുതൽ നേടിയ സുരേന്ദ്രനെ നേതൃത്വത്തിലേക്ക് കൊണ്ടു വരുന്നത് പാർട്ടിക്ക് ഗുണം ചെയ്യുമെന്നാണ് വിലയിരുത്തൽ. കേന്ദ്ര മന്ത്രിയായി വി.മുരളീധരൻ നൽകുന്ന പിന്തുണയും വലിയ മുതൽക്കൂട്ടാകും.

അതെ സമയം, പി.എസ് ശ്രീധരൻപിള്ളയെ പുതുതായി ആരംഭിക്കുന്ന ലോ കമ്മീഷനിലേക്ക് പരിഗണിക്കുന്നതിനൊപ്പം ഗവർണർ പദവിയിലേക്കും പരിഗണിക്കുന്നതായാണ് സൂചന. ബിജെപി ദേശീയ നേതൃത്വത്തിന് ആർഎസ്എസിന്റെ പൂർണ പിന്തുണ കൂടി ഉണ്ടെങ്കിൽ മാത്രമേ സുരേന്ദ്രനെ സംസ്ഥാന അധ്യക്ഷനാക്കാൻ സാധിക്കൂ.