K Surendran: മഞ്ചേശ്വരം കേസിൽ സുരേന്ദ്രൻ പിന്നോട്ടില്ല; റസാഖിന്‍റെ മകനും കക്ഷി ചേരുന്നു

കൊച്ചി: മഞ്ചേശ്വരം തെരഞ്ഞെടുപ്പ് കേസിൽ നിന്ന് സുരേന്ദ്രൻ പിന്നോട്ടില്ല. തെരഞ്ഞെടുപ്പ് കേസായതിനാൽ സ്വയം പിൻവലിച്ച് പോകാൻ കഴിയില്ലെന്ന് സുരേന്ദ്രന് നിയമോപദേശം ലഭിച്ചെന്നാണ് റിപ്പോര്‍ട്ടുകള്‍. തന്നെ 89 വോട്ടുകള്‍ക്ക് പിബി അബ്ദുള്‍ റസാഖ് പരാജയപ്പെടുത്തിയത് കള്ള വോട്ടുകളുടെ ബലത്തിലാണെന്ന് കാണിച്ച് സുരേന്ദ്രൻ നല്‍കിയ ഹര്‍ജി ഹൈക്കോടതിയിലുടെ പരിഗണനയിലിരിക്കേയാണ് കഴിഞ്ഞ ഒക്ടോബര്‍ 20ന് അബ്ദുള്‍ റസാഖ് എംഎൽഎ മരണപ്പെട്ടത്.

റസാഖിന്‍റെ മരണത്തോടെ സുരേന്ദ്രൻ കേസിൽ നിന്നു പിൻമാറുമോ എന്ന ചോദ്യം ഉയര്‍ന്നിരുന്നു. അതേസമയം, റസാഖ് മരിച്ച സാഹചര്യത്തിൽ റസാഖിന്‍റെ മകൻ കേസിൽ കക്ഷിചേരും. കേസിൽ നിന്ന് പിൻമാറില്ലെന്ന് സുരേന്ദ്രൻ നേരത്തെ ഹൈക്കോടതിയെ അറിയിച്ചിരുന്നു.

അബ്ദുള്‍ റസാഖിന്‍റെ തെരഞ്ഞെടുപ്പ് ഫലം റദ്ദാക്കണമെന്നും തന്നെ വിജയിയായി പ്രഖ്യാപിക്കണമെന്നുമായിരുന്നു സുരേന്ദ്രൻ ഹൈക്കോടതിയിൽ ആവശ്യപ്പെട്ടത്. മരണപ്പെട്ടവരും വിദേശത്തുള്ളവരുമായ 259 പേരുടെ പേരിൽ റസാഖിനുവേണ്ടി കള്ളവോട്ട് ചെയ്തിട്ടുണ്ടെന്നാണ് സുരേന്ദ്രന്‍റെ വാദം. കേസിൽ 67 സാക്ഷികള്‍ക്ക് സമൻസ് അയയ്ക്കുകയും 175 സാക്ഷികളുടെ വിസ്താരം പൂര്‍ത്തിയാക്കുകയും ചെയ്തിരുന്നു. കോടതിയുടെ പരിഗണനയിലുള്ള കേസിൽ തീര്‍പ്പുണ്ടായതിനുശേഷം മാത്രം ഉപതെരഞ്ഞെടുപ്പ് മതിയെന്ന നിലപാടിലാണ് തെരഞ്ഞെടുപ്പ് കമ്മീഷൻ.