കെ സുരേന്ദ്രനെ തിരുവനന്തപുരം സെന്‍ട്രല്‍ ജയിലിലേക്ക് മാറ്റും

റാന്നി: ബിജെപി സംസ്ഥാന ജനറല്‍ സെക്രട്ടറി കെ സുരേന്ദ്രനെ തിരുവനന്തപുരം ജയിലിലേക്ക് മാറ്റും. ജയില്‍ മാറ്റം ആവശ്യപ്പെട്ട് കെ സുരേന്ദ്രന്‍ സമര്‍പ്പിച്ച ഹര്‍ജിയിലാണ് കോടതിയുടെ തീരുമാനം. ആരോഗ്യസ്ഥിതി കണക്കിലെടുത്ത് തിരുവനന്തപുരം സെന്‍ട്രല്‍ ജയിലിലേക്കാണ് സുരേന്ദ്രനെ മാറ്റുന്നത്. റാന്നി മജിസ്ട്രേറ്റ് കോടതിയാണ് സുരേന്ദ്രന്‍റെ ജയില്‍മാറ്റം അംഗീകരിച്ച് ഉത്തരവിറക്കിയത്.

ശബരിമലയിൽ അമ്പത്തിരണ്ടുകാരിയ അയ്യപ്പഭക്തയെ ആക്രമിച്ച കേസിൽ റിമാൻഡിൽ കഴിയുകയാണ് സുരേന്ദ്രൻ ഇപ്പോൾ. ഈ കേസിലും ജാമ്യം ലഭിച്ചാൽ മാത്രമേ സുരേന്ദ്രന് ജയിൽ നിന്ന് പുറത്ത് വരാൻ കഴിയൂ. അതേസമയം കണ്ണൂരില്‍ പോലീസുകാരെ ഭീഷണിപ്പെടുത്തിയ കേസില്‍ സുരേന്ദ്രന് ജാമ്യം ലഭിച്ചരുന്നു. അതേസമയം ബിജെപി നേതാക്കളെ കള്ളക്കേസിൽ കുടുക്കി ശബരിമലയിൽ നിന്ന് മാറ്റിയ ശേഷം യുവതികളെ പ്രവേശിപ്പിക്കാനുള്ള ശ്രമമാണ് സർക്കാരിന്റെ ഭാഗത്ത് നിന്ന് ഉണ്ടാകുന്നതെന്നാണ് സുരേന്ദ്രന്‍റെ ആരോപണം.