കൈലി മടക്കികുത്തി മന്ത്രി തടയിണ നി‍ര്‍മ്മിക്കാനിറങ്ങി

ശബരിമല: കുറ്റിപ്പുറം മിനി പമ്പയിൽ തടയിണ നിർമ്മാണത്തിനായി തദ്ദേശസ്വയംഭരണവകുപ്പ് മന്ത്രി ഡോ.കെ.ടി ജലീൽ ജനങ്ങളോടൊപ്പം ഇറങ്ങി. ഇവിടെ വരുന്ന അയ്യപ്പസ്വാമിമാർക്ക് കുളിക്കാൻ നിളാ നദിയിൽ വെള്ളകുറവായതിന്റെ പേരിൽ ഭാരതപ്പുഴക്ക് കുറുകെ ബണ്ട് കെട്ടാൻ പൊരിവെയിലത്ത് മന്ത്രിയും നാട്ടുകാരോടൊപ്പം കൂടിയത് കൗതുകമായി.

കടവില്‍ കുളിക്കാനിറങ്ങുന്ന തീര്‍ത്ഥാടകരുടെ സുരക്ഷ ഉറപ്പാക്കുന്നതിനായി കടവിനരികല്‍ സുരക്ഷാ വേലിയും 10 ലൈഫ് ഗാര്‍ഡുകളെയും ഡിടിപിസി നിയോഗിച്ചിട്ടുണ്ട്. തമിഴ്, കന്നട, തെലുങ്ക് ഭാഷകളില്‍ മുന്നറിയിപ്പ് ബോര്‍ഡുകള്‍ സ്ഥാപിക്കും. കടവില്‍ ഇറങ്ങാന്‍ പറ്റാത്തവര്‍ക്ക് ഷവര്‍ ബാത്തിനുള്ള സൗകര്യവും ഒരുക്കിയിട്ടുണ്ട്. 5,000 ഗാലന്‍ സംഭരണ ശേഷിയുള്ള ആറ് കുടിവെള്ള ടാങ്കുകളും സജ്ജമാക്കും. ആവശ്യത്തിന് ടോയ്‌ലറ്റ് സൗകര്യവുമൊരുക്കും. പ്രദേശത്ത് ലൈറ്റിങ് സംവിധാനം മെച്ചപ്പെടുത്തുന്നതിന്റെ ഭാഗമായി 10 അസ്‌ക ലൈറ്റുകള്‍ കൂടി സ്ഥാപിക്കും.

പ്രദേശത്തെ കിണര്‍ വൃത്തിയാക്കുന്നതിനും വെള്ളത്തിന്റെ ഗുണമേന്മ ഉറപ്പാക്കുന്നതിനും നിര്‍ദേശം നല്‍കി.
ഫയര്‍ ആന്റ് റെസ്‌ക്യുവിന്റെയും പോലിസിന്റെയും സുരക്ഷാ സംവിധാനങ്ങളും മിനി പമ്പയിലുണ്ടാവും. ആവശ്യമുള്ള വാഹനങ്ങളും രക്ഷാ പ്രവര്‍ത്തനങ്ങള്‍ക്ക് ഉപയോഗിക്കുന്ന സ്‌കൂബാ സെറ്റുമടക്കം ഇരു വകുപ്പുകളിലെയും ഉദ്യോഗസ്ഥര്‍ സുരക്ഷ ഉറപ്പാക്കും.കെഎസ്ആര്‍ടിസിയുടെ പ്രത്യേക സര്‍വീസ് മിനി പമ്പയില്‍ നിന്നു എല്ലാ ദിവസവും വൈകീട്ട് പമ്പയിലേക്ക് സര്‍വീസ് നടത്തുന്നതിനും തീരുമാനമായിട്ടുണ്ട്.



k t jaleel helps local people to build anicut in mini pumba