ബോധപൂര്‍വം പ്രശ്നങ്ങളുണ്ടാക്കാനാണ് ആര്‍എസ്‌എസും ബിജെപിയും ശ്രമിക്കുന്നതെന്ന് കടകംപള്ളി

കണ്ണൂര്‍: ശബരിമലയില്‍ ബോധപൂര്‍വ്വം പ്രശ്നങ്ങളുണ്ടാക്കാനാണ് ആര്‍എസ്എസും ബിജെപിയും ശ്രമിക്കുന്നതെന്ന് ദേവസ്വം മന്ത്രി കടകംപള്ളി സുരേന്ദ്രന്‍. ശബരിമലയെ ആര്‍എസ്എസിന് കൈമാറാന്‍ ഉദ്ദേശിക്കുന്നില്ലെന്ന് മന്ത്രി വ്യക്തമാക്കി.

കഴിഞ്ഞ മാസങ്ങളിലെ പോലെ പ്രശ്നങ്ങളുണ്ടാക്കാനാണ് പ്രതിഷേധക്കാരുടെ നീക്കം. എന്നാല്‍ ഇത് അനുവദിക്കില്ലെന്ന് പോലീസ് വ്യക്തമാക്കിയിട്ടുണ്ടെന്ന് മന്ത്രി പറഞ്ഞു.

ഇന്നലെ ബോധപൂര്‍വ്വം പ്രശ്നങ്ങളുണ്ടാക്കിയവരെയാണ് പോലീസ് അറസ്റ്റ് ചെയ്തുനീക്കിയത്. പ്രതിഷേധം നടയടച്ചതിനുശേഷം അവസാനിപ്പിക്കാമെന്ന് വ്യക്തമാക്കിയിരുന്നു. എന്നാല്‍ നടയടച്ചതോടെ ഇതില്‍ നിന്ന് പിന്മാറുകയായിരുന്നു. ഇതേടെ പ്രതിഷേധം സംഘടിപ്പിച്ച നേതാവിനെ അറസ്റ്റ് ചെയ്യുകയും പിന്നീട് നേതാവിന്‍റെ ആവശ്യപ്രകാരം എല്ലാവരെയും അറസ്റ്റ് ചെയ്യുകയായിരുന്നു.

കേന്ദ്രമന്ത്രി അല്‍ഫോണ്‍സ് കണ്ണന്താനം അനാവശ്യമായി രാഷ്ട്രീയ ആരോപണങ്ങള്‍ ഉന്നയിക്കുകയാണ്. ശബരിമലയിലെ സുരക്ഷയെക്കുറിച്ച് തീരുമാനിക്കുന്നത് കേന്ദ്ര ആഭ്യന്തരവകുപ്പാണ്. വിശ്വാസത്തിന്‍റെ പേരിലാണ് പ്രതിഷേധം നടത്തുന്നത്. എന്നാല്‍ എത് വിശ്വാസിയെയാണ് ഇവര്‍ സംരക്ഷിക്കുന്നതെന്നും മന്ത്രി ചോദിച്ചു.