ജേക്കബ് തോമസിന്‍റെ പരിഹാസത്തെ പരിഗണിക്കേണ്ടെന്ന് കടകംപള്ളി

തിരുവനന്തപുരം: ശബരിമലയിലെ നിരോധനാജ്ഞയെ പരിഹസിച്ച മുന്‍ വിജിലന്‍സ് ഡയറക്ടര്‍ ജേക്കബ് തോമസിന് മറുപടിയുമായി ദേവസ്വം മന്ത്രി കടകംപള്ളി സുരേന്ദ്രന്‍. ജേക്കബ് തോമസിന്‍റെ പരിഹാസത്തെ പരിഗണിക്കേണ്ടെന്ന് വ്യക്തമാക്കിയാണ് മന്ത്രി രംഗത്തെത്തിയിരിക്കുന്നത്.

ബിജെപിയിലെ എ എന്‍ രാധാകൃഷ്ണനെ പോലയുള്ള പോലീസിലെ പതിപ്പാണ് ജേക്കബ് തോമസ്. നാവിന് എല്ലില്ലാത്തതുകൊണ്ട് എന്തും വിളിച്ചു പറയുന്ന സ്വഭാവക്കാരനാണ് അദ്ദേഹം. നിരോധനജ്ഞ ആര്‍ക്കെതിരെയാണെന്നത് വ്യക്തമാണ്. ഇന്നലെ സന്നിധാനത്ത് നാമജപമെന്ന പേരില്‍ പ്രതിഷേധിച്ചത് ക്രിമിനലുകളാണെന്നും മന്ത്രി പറഞ്ഞു.

ഇന്നു രാവിലെയാണ് സന്നിധാനത്തേക്ക് എത്തിയ ജേക്കബ് തോമസ് നിരോധനാജ്ഞയെ പരിഹസിച്ച് രംഗത്തെത്തിയത്. താൻ ശബരിമലയിലെ വിശ്വാസികൾക്കൊപ്പം തന്നെയാണെന്ന് ജേക്കബ് തോമസ് പ്രഖ്യാപിച്ചു. നാലിൽ കൂടുതൽ ആളുകളുള്ള വീടുകളിലും നിരോധനാജ്ഞ പ്രഖ്യാപിക്കണമെന്ന് ജേക്കബ് തോമസ് പരിഹസിച്ച് പറഞ്ഞു. എല്ലാ സുപ്രീം കോടതി വിധികളും നടപ്പാക്കിയിട്ടുണ്ടോ എന്നും ജേക്കബ് തോമസ് ചോദിച്ചു.

ഗതാഗതം താറുമാറാകും എന്ന വാദമാണ് നിരോധനാജ്ഞക്ക് പിന്നില്ലെങ്കിൽ ഗതാഗതകുരുക്ക് എന്നും പ്രശ്‌നമായ കൊച്ചിയിലെ കുണ്ടന്നൂരിൽ ആദ്യം നിരോധനാജ്ഞ പ്രഖ്യാപിക്കണം എന്നും ജേക്കബ് തോമസ് പറഞ്ഞു.

അതേസമയം ഇന്നലെ രാത്രിയും നിയന്ത്രണങ്ങൾ മറികടന്ന് ശബരിമലയിൽ നാമജപ പ്രതിഷേധം നടത്തിയ 82 പേരെ പോലീസ് അറസ്റ്റ് ചെയ്തു. ശബരിമലയിൽ വിലക്ക് ലംഘിച്ച് നാമജപം നടത്തി പ്രതിഷേധിച്ചവരെയാണ് പോലീസ് അറസ്റ്റ് ചെയ്തത്. ബിജെപി കോട്ടയം ജില്ലാ ട്രഷറർ കെ.ജി.കണ്ണൻ ഉൾപ്പടെയുളളവർ അറസ്റ്റ് ചെയ്യപ്പെട്ടവരിൽ ഉൾപ്പെടുന്നു. അറസ്റ്റിലായവരെ മണിയാർ എഎആർ ക്യാമ്പിലെത്തിച്ച ശേഷം സ്റ്റേഷൻ ജാമ്യം നൽകി.