ശബരിമലയില്‍ ക്രമസമാധാന പ്രശ്നമുണ്ടായാല്‍ സര്‍ക്കാര്‍ ഇടപെടുമെന്ന് കടകംപള്ളി

തിരുവനന്തപുരം: ശബരിമലയിലേക്ക് എത്തുന്ന എല്ലാ യുവതികളുടെയും സുരക്ഷ സംബന്ധിച്ച് ക്രമസമാധാന പ്രശ്നമുണ്ടായാല്‍ സര്‍ക്കാര്‍ ഇടപെടുമെന്ന് അറിയിച്ച് ദേവസ്വം മന്ത്രി കടകംപള്ളി സുരേന്ദ്രന്‍. ആര്‍എസ്എസും ബിജെപിയുടെയും കൈകളാണ് ഇത്തരത്തിലുള്ള പ്രവണതകള്‍ക്കു പിന്നിലെന്ന് മന്ത്രി വ്യക്തമാക്കി.

ശബരിമലയില്‍ തീര്‍ത്ഥാടനത്തിനെത്തുന്ന മുഴുവന്‍ വിശ്വാസികള്‍ക്കും സര്‍ക്കാര്‍ സംരക്ഷണം ഒരുക്കുമെന്ന് വ്യവസായ മന്ത്രി ഇ.പി ജയരാജനും വ്യക്തമാക്കിയിരുന്നു.

എന്നാല്‍ പമ്പയിലേക്ക് ശബരിമല തീർത്ഥാടനത്തിന് പോയ കെഎസ്ആർടിസി ബസുകളിൽ പരിശോധനയെ തുടർന്ന് വിദ്യാർഥിനികളെ ഇറക്കി വിട്ടു. സ്ത്രീകളുടെ സംഘമാണ് ജേർണലിസം വിദ്യാർഥിനികളെയും മാധ്യമപ്രവർത്തകരെയും ബസിൽ നിന്ന് ഇറക്കി വിട്ടത്. ശബരിമലയിലേക്ക് സ്ത്രീകളെ പോകാൻ അനുവദിക്കില്ല എന്ന് പറഞ്ഞാണ് സ്ത്രീകളുടെ സംഘം ബസിനടുത്തേക്ക് എത്തിയത്. സ്ത്രീകളെ ബസിൽ നിന്ന് ഇറക്കി വിട്ട സംഘം ആരാണെന്നോ നിയമം കൈയിലെടുക്കുന്ന രീതിയിൽ എന്ത് പിൻബലത്തിലാണ് അവർ പ്രവർത്തിച്ചതെന്നോ വ്യക്തമല്ല.

സുപ്രീം കോടതി ഉത്തരവിനെതിരായി സ്ത്രീകളെ തടയുന്നവർക്കെതിരെ ശക്തമായ നടപടിയെടുക്കുമെന്ന് ഡിജിപി നേരത്തെ അറിയിച്ചിരുന്നു. ബസിനുള്ളിൽ നിന്ന് സ്ത്രീകളെ ബലമായി വലിച്ചിറക്കാൻ ശ്രമമുണ്ടായി. നിലക്കലിൽ ഒരു സ്ത്രീ മരത്തിന് മുകളിൽ കയറി ഇരുന്ന് ആത്മഹത്യാ ഭീഷണി മുഴക്കിയതായും റിപ്പോർട്ടുണ്ട്. കഴിഞ്ഞ എട്ട് ദിവസങ്ങളായി കടന്നു പോകുന്ന ബസുകളിൽ സ്ത്രീകളുണ്ടോ എന്ന് പ്രദേശവാസികളായ സ്ത്രീകൾ പരിശോധിച്ചിരുന്നു. സ്ത്രീകളില്ലാ എന്ന് ഉറപ്പു വരുത്തിയ ശേഷം മാത്രാമാണ് വാഹനങ്ങൾ കടത്തി വിട്ടത്. നിലക്കലിൽ സംഘർഷാവസ്ഥ നിലനിൽക്കുന്ന സാഹചര്യത്തിൽ മതിയായ പോലീസ് സംഘത്തെ വിന്യസിച്ചിട്ടില്ലെന്ന് പരാതി ഉയർന്നിരുന്നു.