മണിയുടെ ആന്തരികാവയവങ്ങള്‍ വീണ്ടും പരിശോധനയ്ക്ക് അയച്ചു

കലാഭവന്‍ മണിയുടെ മരണം ആത്മഹത്യയോ കൊലപാതകമോ എന്ന കാര്യത്തില്‍ ഇതുവരെ വ്യക്തതയില്ല. മണി അറിയാതെ കീടനാശിനി കലക്കി കഴിപ്പിച്ചതാണെങ്കില്‍ അതിന്റെ സാധ്യതയും പരിശോധിക്കും. അതിരൂക്ഷഗന്ധമുള്ള കീടനാശിനി മണി അറിയാതെ കഴിപ്പിക്കാന്‍ സാധിക്കുമോ എന്ന ചോദ്യവും പൊലീസിനെ കുഴക്കുന്നുണ്ട്.

അതീവഗുരുതരാവസ്ഥയില്‍ മണിയെ ആശുപത്രിയിലേക്ക് കൊണ്ടുപോകുമ്ബോഴോ ആശുപത്രിയില്‍ പ്രവേശിപ്പിച്ച സമയത്തോ മരണത്തിനു ശേഷം പോസ്റ്റ്മോര്‍ട്ടം ചെയ്തപ്പോഴോ കീടനാശിനിയുടെ ഗന്ധം ഉണ്ടായിരുന്നില്ലെന്നാണ് ഡോക്ടര്‍മാര്‍ പൊലീസിനു നല്‍കിയ മൊഴി. ഏതെങ്കിലും വിഷാംശം ശരീരത്തില്‍ കലര്‍ന്നാല്‍ ഗന്ധമുണ്ടാകും. വായില്‍ നിന്നു നുരയും പതയും വരാനും സാധ്യത ഉണ്ട്. അതുകൊണ്ടു തന്നെ മണിയുടെ ആന്തരികാവയവങ്ങള്‍ വീണ്ടും പരിശോധനയ്ക്ക് അയയ്ക്കും.

കൊച്ചിയിലെ ആശുപത്രിയില്‍ ശേഖരിച്ചിരുന്ന മണിയുടെ രക്തത്തിന്റെയും മൂത്രത്തിന്റെയും സാംപിളുകള്‍ പൊലീസ് വീണ്ടും പരിശോധനയ്ക്കായി ലാബിലേക്ക് അയച്ചു.