കണ്ണൂര്‍ വിമാനത്താവളം: എയര്‍ ഇന്ത്യ ടിക്കറ്റ് ബുക്കിംഗ് ആരംഭിച്ചു

കണ്ണൂര്‍: കണ്ണൂര്‍ രാജ്യാന്തര വിമാനത്താവളം അടുത്ത മാസം പ്രവര്‍ത്തനം തുടങ്ങുന്ന സാഹചര്യത്തില്‍ എയര്‍ ഇന്ത്യ എക്സ്പ്രസ് ടിക്കറ്റ് ബുക്കിംഗ് ആരംഭിച്ചു. ആദ്യഘട്ടത്തില്‍ ഗള്‍ഫ് രാജ്യങ്ങളായ ഷാര്‍ജ, ദോഹ, അബുദാബി, മസ്ക്കറ്റ്, റിയാദ് എന്നിവിടങ്ങളിലേക്കും തിരിച്ചുമുള്ള സര്‍വ്വീസുകളുടെ ബുക്കിംഗാണ് ആരംഭിച്ചിരിക്കുന്നത്. അതേസമയം ദുബായിലേക്കുള്ള സര്‍വ്വീസ് ആദ്യഘട്ടത്തില്‍ ഉണ്ടായിരിക്കില്ല.

ഡിസംബർ ഒൻപതിന് രാവിലെ പത്തിന് അബുദാബിയിലേക്കുള്ള പറത്തിയാണ് എയർ ഇന്ത്യ സർവീസ് തുടങ്ങുന്നത്. കണ്ണൂര്‍ വിമാനത്താവളത്തിൽ നിന്നും സർവീസ് നടത്താൻ നിലവില്‍ ഒരു വിമാനമാണ് എയർ ഇന്ത്യ എത്തിക്കുക.ഡിസംബർ എട്ടിന് തിരുവനന്തപുരത്തു നിന്നും ഈ വിമാനം എത്തും. അബുദാബിയിലേക്കുള്ള ഇതേ വിമാനം തന്നെ വൈകിട്ട് ഏഴിന് തിരിച്ചെത്തും. തുടര്‍ന്ന് 9.05ന് റിയാദിലേക്ക് വിമാനം സർവീസ് നടത്തും.