കണ്ണൂർ വിമാനത്താവളത്തിൽ ഡിസമ്പറോടെ സർവീസ് ആരംഭിക്കും

കണ്ണൂർ: കണ്ണൂർ വിമാനത്താവളത്തിന് ഡയറക്ടർ ജനറൽ ഓഫ് സിവിൽ ഏവിയേഷന്റെ(ഡിജിസിഎ) അനുമതി. വിമാനത്താവളത്തിന് ഏറോഡ്രാം ലൈസൻസ് ഇന്ന് ലഭിച്ചതോടെയാണ് പ്രവർത്തനാനുമതി ഉറപ്പായത്. ഈ വർഷം ഡിസമ്പറോടെ വിമാനസർവീസുകൾ ആരംഭിക്കുമെന്നാണ് സൂചന.

കണ്ണൂർ വിമാനത്താവളം എന്ന് ഉദ്‌ഘാടനം ചെയ്യുമെന്ന് ഉടൻ അറിയാനാകും. ഏറോഡ്രാം ഡാറ്റ പ്രാബല്യത്തിൽ വരുന്ന ഡിസമ്പർ ആറു മുതൽ സർവീസ് തുടങ്ങാൻ കഴിയുമെന്നാണ് കണ്ണൂർ വിമാനത്താവള കമ്പനിയായ കിയാൽ പ്രതീക്ഷിക്കുന്നത്. എയർ ഇന്ത്യ, എയർ ഇന്ത്യ എക്സ്പ്രസ്, ജെറ്റ് എയർവേയ്‌സ്, ഇൻഡിഗോ, സ്‌പൈസ് ജെറ്റ്, ഗോ എയർ എന്നീ കമ്പനികൾ കണ്ണൂരിൽ നിന്ന് സർവീസ് നടത്താമെന്ന് സമ്മതിച്ചിട്ടുണ്ട്. കണ്ണൂരിലെ അവസാന പരീക്ഷണ പറക്കൽ കഴിഞ്ഞ മാസം 20ന് നടന്നിരുന്നു.