കണ്ണൂരിലെ സ്ഫോടനം: അനു മാലിക് കസ്റ്റഡിയിൽ

കണ്ണൂര്‍: പൊടിക്കുണ്ട് രാജേന്ദ്രനഗര്‍ കോളനിയിലെ ഇരുനില വീട്ടിലുണ്ടായ സ്‌ഫോടനവുമായി ബന്ധപ്പെട്ട് അനു മാലിക്കിനെ കണ്ണൂര്‍ ടൗണ്‍ പോലീസ് കസ്റ്റഡിയില്‍ എടുത്തു. ഇയാൾ വാടകയ്ക്ക് എടുത്തിരുന്ന വീട്ടിലാണ് സ്ഫോടനം ഉണ്ടായത്. കൂത്തുപറമ്പിലെ ക്ഷേത്രോത്സവത്തിനായി നിർമിച്ച സ്ഫോടക വസ്തുക്കളാണ് പൊട്ടിത്തെറിച്ചതെന്ന് ഇയാൾ പോലീസിനോട് പറഞ്ഞു. സ്ഫോടനം നടക്കുമ്പോൾ ഇയാൾ വീട്ടിലുണ്ടായിരുന്നില്ല. സംഭവത്തിൽ മാലിക്കിന്‍റെ ഭാര്യ റാഹില, മകൾ ഹിബ എന്നിവർക്ക് പൊള്ളലേറ്റിരുന്നു. സ്ഫോടനത്തിൽ വീട് പൂ‍ർണമായും തകർന്നിരുന്നു.

വ്യാഴാഴ്ച രാത്രി 11.45നായിരുന്നു വീട്ടിൽ സ്ഫോടനം ഉണ്ടായത്. സ്ഫോടനത്തിന്‍റെ പ്രകമ്പനത്തിൽ സമീപത്തെ വീടുകൾക്കും കേടുപാടുകളുണ്ടായി. പരിസരവാസികളായ മൂന്ന് പേർ‍ക്കും പരിക്കേറ്റിരുന്നു.