കണ്ണൂർ എംപി കെ സുധാകരന് കൊവിഡ്-19 സ്ഥിരീകരിച്ചു

കണ്ണൂർ: കണ്ണൂർ എംപിയും മുതിർന്ന കോൺഗ്രസ് നേതാവുമായ കെ സുധാകരന് കൊവിഡ്-19 സ്ഥിരീകരിച്ചു. സുധാകരൻ ഫേസ്ബുക്ക് പേസ്റ്റിലൂടെയാണ് ഇക്കാര്യം അറിയിച്ചത്. താനുമായി നേരിട്ട് സമ്പർക്കത്തിൽ ഏർപ്പെട്ടവർ ക്വാറന്‍റൈനിൽ പോകുന്നത് ഉൾപ്പെടെയുള്ള മുൻ കരുതലുകൾ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.

കണ്ണൂരിൽ വിവിധ യുവജന സംഘടനകള്‍ മന്ത്രിമാരുടെ രാജി ആവശ്യപ്പെട്ട് കലക്ട്രേറ്റിലേക്ക് നടത്തിയ സമരത്തെ നേരിട്ട എസ്ഐക്കും എഎസ്ഐക്കും കൊവിഡ് സ്ഥിരീകരിച്ചത് ആശങ്ക പരത്തിയിട്ടുണ്ട്. ഇതോടെ കണ്ണൂര്‍ ടൗണ്‍ സ്റ്റേഷനില്‍ കൊവിഡ് ബാധിച്ച പോലീസുകാരുടെ എണ്ണം നാലായി. എസ്ഐ തളിപ്പറമ്പ് സ്വദേശിയും എഎസ്ഐ പഴയങ്ങാടി സ്വദേശിയുമാണ്. രണ്ടാഴ്ച മുമ്പ് ടൗണ്‍ സ്റ്റേഷനിലെ ഒരു പോലീസുകാരന് കൊവിഡ് ബാധിച്ചതിനെ തുടര്‍ന്ന് ക്വാറന്റൈനില്‍ പോയ 10 പേരിലുള്ളവരാണ് എസ്ഐയും എഎസ്ഐയും


Also Read: കേരളത്തിൽ ഇന്ന് 7006 കൊവിഡ്-19 കേസുകൾ; 3199 പേർക്ക് രോഗമുക്തി

നേരത്തെ എൻകെ പ്രേമചന്ദ്രൻ എംപിയ്ക്കും കൊവിഡ് സ്ഥിരീകരിച്ചിരുന്നു. ന്യൂഡൽഹിയിൽ സഭാ സമ്മേളനത്തിന് എത്തിയപ്പോഴായിരുന്നു അദ്ദേഹത്തിന്‍റെ കൊവിഡ് പരിശോധന ഫളം പുറത്ത് വന്നത്. തുടർന്ന് താൻ ഡൽഹി എയിംസിൽ അഡ്മിറ്റാവുകയാണെന്ന് അദ്ദേഹം അറിയിച്ചിരുന്നു. ഇതിന് പിന്നാലെയാണ് സുധാകരന്‍റെ പരിശോധനാ ഫലവും പുറത്ത് വരുന്നത്.

അതേസമയം സംസ്ഥാനത്ത് പ്രതിദിന കൊവിഡ് കേസുകളിലെ വർധനവ് ആശങ്കാജനകമായി തുടരുകയാണ്. ഏറ്റവും കൂടുതൽ പ്രതിദിന കൊവിഡ് കേസുകൾ റിപ്പോർട്ട് ചെയ്ത ദിവസമാണ് ഇന്ന്. 7006 പേർക്ക് കൂടി രോഗം സ്ഥിരീകരിച്ചതോടെ നിലവിൽ ചികിത്സയിലുള്ളവരുടെ എണ്ണം 52,678 ആയി ഉയർന്നിരിക്കുകയാണ്.

തിരുവനന്തപുരത്ത് തന്നെയാണ് കൂടുതലാളുകൾ ചികിത്സയിലുള്ളത്. ജില്ലയിൽ സമ്പർക്കത്തിലൂടെയുള്ള കൊവിഡ് കേസുകൾ ആശങ്ക ഉയർത്തുന്നതാണ്. രോഗം സ്ഥിരീകരിച്ച് ചികിത്സയിലായിരുന്ന 3199 പേരുടെ പരിശോധനാ ഫലമാണ് ഇന്ന് നെഗറ്റീവായത്, ഇതോടെ സംസ്ഥാനത്ത് രോഗമുക്തി നേടിയവരുടെ ആകെ എണ്ണം 1,14,530 ആയിട്ടുമുണ്ട്.