പ്രായ വ്യത്യാസം അരുണിന് അപമാനമായി തോന്നി; വഴക്ക് പതിവായിരുന്നു; പത്ത് ലക്ഷം തട്ടിയെന്നും ആരോപണം

തിരുവനന്തപുരം: ത്രേസ്യാപുരം സ്വദേശി ശാഖാകുമാരിയുടെ (51) മരണത്തിൽ വെളിപ്പെടുത്തലുമായി കാര്യസ്ഥൻ വിജയകുമാർ. ശാഖയുടെ ഭർത്താവ് അരുണിന് (28) ഇരുവരും തമ്മിലുള്ള പ്രായവ്യത്യാസം അപമാനകരമായി തോന്നിയെന്നും ശാഖ പത്ത് ലക്ഷം രൂപ അരുണിന് നൽകിയിട്ടുണ്ടെന്നും വിജയകുമാർ പറഞ്ഞു.

പരേതനായ അധ്യാപകന്റെ മകളാണ് ശാഖ. ശാഖയുടെ ആദ്യ വിവാഹമാണിത്. മാതാവ് കിടപ്പു രോഗിയാണ്. ഇവരുടെ കുടുംബത്തിന് വലിയ ഭൂസ്വത്തുണ്ട്. ഒരേക്കറിൽ അധികമുള്ള സ്ഥലത്താണ് ശാഖയുടെ വീടിരിക്കുന്നതെന്ന് അയൽക്കാർ പറയുന്നു. ശാഖയും അരുണും തമ്മിൽ വഴക്ക് പതിവായിരുന്നു, വിവാഹ സത്കാര വേദിയിൽ നിന്നും അരുൺ ഇറങ്ങിപ്പോയി കാറിൽ കറങ്ങി നടന്നതായി അയൽവാസി പറഞ്ഞു, മനോരമ റിപ്പോർട്ട് ചെയ്തു.

ഫോട്ടോ പുറത്തു വിട്ടത് ഇഷ്ടപ്പെട്ടില്ല; വിവാഹ രജിസ്ട്രേഷനും വൈകി; അരുൺ ലക്ഷ്യമിട്ടത് സ്വത്തോ?
ശാഖയും അരുണും തമ്മിൽ പ്രണയത്തിലായിരുന്നു. വിവാഹത്തിന് ശാഖയാണ് മുൻകൈയ്യെടുത്തത്. പത്ത് ലക്ഷം രൂപയ്ക്കു പുറമേ കാറും അരുണിന് ശാഖ വാങ്ങി നൽകിയിരുന്നു. അരുൺ പത്താംകല്ല് സ്വദേശിയാണെന്നു മാത്രമാണ് നാട്ടുകാർക്ക് അറിയാമായിരുന്നത്. ദിവസങ്ങൾക്കു മുമ്പാണ് ഇരുവരും വിവാഹം രജിസ്റ്റർ ചെയ്യുന്നതിനായി പഞ്ചായത്തിൽ പോയത്. അരുണിന്റെ പെരുമാറ്റത്തിൽ ആദ്യം മുതൽ സംശയമുണ്ടായിരുന്നുവെന്നും നാട്ടുകാർ പറയുന്നു.

തിരിച്ചും മറിച്ചുമുള്ള ചോദ്യത്തിനൊടുവിലാണ് അരുൺ കുറ്റം സമ്മതിച്ചത്. ഷോക്കേൽപ്പിച്ചാണ് കൊലപാതകം നടത്തിയതെന്നും വിവാഹ മോചനം നൽകാത്തതുകൊണ്ടാണ് കൃത്യം നടത്തിയതെന്നും അരുൺ മൊഴി നൽകി.