നിലയ്‍ക്കലില്‍ കര്‍ണാടകത്തില്‍ നിന്ന് യുവതിയെത്തി

ശബരിമല: കര്‍ണാടകത്തില്‍ നിന്ന് ശബരിമല തീര്‍ഥാടകരുടെ സംഘത്തില്‍ ഒരു യുവതിയും എത്തി. നായ്യമ്മ എന്ന യുവതിയാണ് നിലയ്‍ക്കല്‍വരെ എത്തിയത്. മല കയറാനല്ല എത്തിയതെന്നാണ് ഇവര്‍ പറയുന്നത്. ആചാരങ്ങള്‍ ഒന്നും തനിക്ക് അറിയില്ല. ആചാരങ്ങള്‍ തെറ്റിക്കാനും ശ്രമിക്കുന്നില്ല. ഞാന്‍ ശബരിമലയിലേക്ക് പോകുന്നില്ല - നയ്യാമ്മ പറഞ്ഞു.

യുവതീ പ്രവേശനം അനുവദിച്ച സുപ്രീംകോടതി വിധി ഇപ്പോഴും പ്രാബല്യത്തിലാണ്. പുനപരിശോധന ഹര്‍ജികള്‍ ജനുവരി 22ന് സുപ്രീംകോടതി പരിഗണിക്കും. അപ്പോഴേക്കും മണ്ഡലകാലം അവസാനിക്കും. നിലവിലെ സുപ്രീംകോടതി വിധി സ്റ്റേ ചെയ്യാത്തത് കൊണ്ട് സ്ത്രീ പ്രവേശനം നടപ്പാക്കേണ്ട ബാധ്യത കേരള സര്‍ക്കാരിനാണ്.

Read More: സന്നിധാനത്ത് നാമജപം നടത്തിയവരെ കൂട്ടമായി അറസ്റ്റ് ചെയ്‍തു

മണ്ഡലകാലം തുടങ്ങിയ ശേഷം ബിജെപി നേതാക്കളായ കെ. സുരേന്ദ്രന്‍, ഹിന്ദു ഐക്യവേദി നേതാവ് കെ.പി ശശികല എന്നിവരെ പോലീസ് അറസ്റ്റ് ചെയ്‍തിരുന്നു. കെ. സുരേന്ദ്രന്‍ ഇപ്പോള്‍ റിമാന്‍ഡിലാണ്. ശശികല, ഇന്ന് വീണ്ടും സന്നിധാനത്ത് എത്തിയിരുന്നു.

ശബരിമലയില്‍ ഭക്തര നിയന്ത്രിക്കുന്നതിന് കനത്ത പോലീസ് സുരക്ഷയാണ് ഏര്‍പ്പെടുത്തിയിട്ടുള്ളത്. കഴിഞ്ഞ ദിവസം പകലും ഭക്തരെ നിയന്ത്രിച്ചിരുന്നു. ശബരിമലയിലെ സംഘര്‍ഷങ്ങള്‍ പരിഗണിച്ച കേരള ഹൈക്കോടതി ദേവസ്വം ബഞ്ച് ഇന്ന് രൂക്ഷമായ ഭാഷയില്‍ സര്‍ക്കാരിനെ വിമര്‍ശിച്ചിരുന്നു. കോടതിയുടെ അടിയന്തര നിര്‍ദേശത്തെ തുടര്‍ന്ന് അഡ്വക്കേറ്റ് ജനറല്‍ കോടതിയില്‍ ഹാജരായിട്ടുണ്ട്.