വിദ്യാഭ്യാസമുള്ള ഒരു പ്രധാനമന്ത്രിയെ 'മിസ്' ചെയ്യുന്നു: കെജ്രിവാള്‍

ന്യൂഡൽഹി: മുൻ പ്രധാനമന്ത്രി മൻമോഹൻ സിങിനെപ്പോലെ ബുദ്ധിയുള്ള ഒരു പ്രധാനമന്ത്രിയുടെ അഭാവം ജനങ്ങള്‍ക്ക് തോന്നിത്തുടങ്ങിയെന്ന് ഡൽഹി മുഖ്യമന്ത്രി അരവിന്ദ് കെജ്രിവാള്‍. പ്രധാനമന്ത്രിയ്ക്ക് വിദ്യാഭ്യാസം അനിവാര്യമാണെന്നും ജനങ്ങള്‍ ഇപ്പോളാണ് ഇത് തിരിച്ചറിയുന്നതെന്നും അദ്ദേഹം ട്വീറ്റ് ചെയ്തു.

പ്രധാനമന്ത്രി നരേന്ദ്ര മോദിയുടെ വിദ്യാഭ്യാസയോഗ്യത സംബന്ധിച്ച് പലപ്പോഴും കെജ്രിവാള്‍ സംശയമുന്നയിച്ചിട്ടുണ്ട്. ഡൽഹിയിലെ ആംആദ്മി പാര്‍ട്ടി നേതാക്കളുടെ വീടുകളിൽ സിബിഐ റെയ്ഡ് നടത്തിയതിലെ അമര്‍ഷമാണ് കെജ്രിവാള്‍ പ്രകടിപ്പിച്ചതെന്നാണ് കരുതുന്നത്.

ഡൽഹി ആരോഗ്യമന്ത്രി സത്യേന്ദ്ര ജെയ്നിന്‍റെ വീട്ടിൽ കഴിഞ്ഞ ദിവസം സിബിഐ റെയ്ഡ് നടത്തിയിരുന്നു. ഡൽഹി സര്‍ക്കാരിന്‍റെ ദൈനംദിന പ്രവര്‍ത്തനങ്ങളിൽ കേന്ദ്രസര്‍ക്കാര്‍ അമിതാധികാരം പ്രയോഗിക്കുന്നുവെന്ന ആരോപണം മുൻപേയുള്ളതാണ്.