വിചാരണ നീട്ടിക്കൊണ്ടു പോകാന്‍ ദിലീപ് ശ്രമിക്കുന്നുവെന്ന് സർക്കാർ

കൊച്ചി: നടിയെ അക്രമിച്ച കേസിന്‍റെ വിചാരണ നീട്ടിക്കൊണ്ടു പോകാനാണ് നടന്‍ ദീലീപ് ശ്രമിക്കുന്നതെന്ന് സര്‍ക്കാര്‍ ഹൈകോടതിയില്‍. കേസില്‍ സിബിഐ അന്വേഷണം ആവശ്യപ്പെട്ട് ദിലീപ് സമര്‍പ്പിച്ച ഹര്‍ജിയില്‍ വാദം നടക്കുന്നതിനിടെയാണ് പോലീസ് എതിര്‍ സത്യവാങ്മൂലം സമര്‍പ്പിച്ചത്.

11 ഹ‍ർജികളാണ് കേസന്വേഷണം വൈകിപ്പിക്കാന്‍ ദിലീപ് കോടതിയില്‍ നല്‍കിയത്. അന്വേഷണ ഏജന്‍സിയെ മാറ്റണമെന്ന് പറയാന്‍ പ്രതിക്ക് അവകാശമില്ലെന്നും സര്‍ക്കാര്‍ കോടതിയെ അറിയിച്ചു. കേസില്‍ ശരിയായ അന്വേഷണം നടന്നില്ലെന്നും തന്നെ കുടുക്കിയെന്നുമുള്ള ദിലീപിന്‍റെ വാദങ്ങളെല്ലാം പോലീസ് തള്ളിക്കളഞ്ഞു. കേസുമായി ബന്ധപ്പെട്ട തെളിവുകളെല്ലാം പ്രതിഭാഗത്തിന് കൈമാറിയിട്ടുണ്ട്.

നടപടിക്രമങ്ങളെല്ലാം പൂര്‍ത്തിയായിട്ടും വിചാരണ നീട്ടാന്‍ ദിലീപ് അനാവശ്യമായി സിബിഐ അന്വേഷണം ആവശ്യപ്പെടുകയാണെന്നും പോലീസ് ഹൈക്കോടതിയെ അറിയിച്ചു.