നടിയെ ആക്രമിച്ച കേസിൽ കുറ്റപത്രം സമർപ്പിച്ചു; ദിലീപ് എട്ടാം പ്രതി

കൊച്ചി: നടിയെ തട്ടിക്കൊണ്ടു പോയി ആക്രമിച്ച കേസില്‍ നടന്‍ ദിലീപിനെതിരായ കുറ്റപത്രം പൊലീസ് സമര്‍പ്പിച്ചു. അയ്യായിരത്തില്‍ അധികം പേജുകളുള്ള കുറ്റപത്രം അങ്കമാലി മജിസ്ട്രേറ്റ് കോടതിയിലാണ് സമ‍ർപ്പിച്ചത്. കേസിൽ ദിലീപ് എട്ടാം പ്രതിയാണ്. മുന്നൂറിലധികം സാക്ഷികളും 450 ല്‍ അധികം രേഖകളും പൊലീസ് ഉള്‍പ്പെടുത്തിയിട്ടുണ്ട്. രണ്ട് മാപ്പുസാക്ഷികളെയാണ് കുറ്റപത്രത്തില്‍ ഉള്‍പ്പെടുത്തിയിരിക്കുന്നത്. അന്വേഷണ ഉദ്യോഗസ്ഥനായ പെരുമ്പാവൂര്‍ സിഐ ബിജു പൗലോസാണ് കുറ്റപത്രം കോടതിയില്‍ സമര്‍പ്പിച്ചത്. പള്‍സര്‍ സുനിയാണ് കേസിലെ ഒന്നാം പ്രതി.

പള്‍സര്‍ സുനിക്ക് ജയിലില്‍ മൊബൈല്‍ ഫോണ്‍ എത്തിച്ച് നല്‍കിയ മേസ്തിരി സുനില്‍ (9), സുനി എഴുതിയ കത്ത് ദിലീപിന്റെ മാനേജര്‍ അപ്പുണ്ണിക്ക് എത്തിച്ച് കൊടുത്ത വിഷ്ണു (10), കേസിലെ സുപ്രധാന തെളിവായ ആക്രമണ ദൃശ്യങ്ങള്‍ പകര്‍ത്തിയ മൊബൈല്‍ ഫോണ്‍ നശിപ്പിക്കാന്‍ ശ്രമിച്ച അഭിഭാഷകൻ പ്രതീഷ് ചാക്കോ, ഇയാളുടെ ജൂനിയര്‍ അഭിഭാഷകന്‍ രാജു ജോസഫ് (12) എന്നിവരാണ് അനുബന്ധ കുറ്റപത്രത്തിലെ മറ്റ് പ്രതികള്‍. അന്തിമ കുറ്റപത്രത്തില്‍ ദിലീപ് അടക്കം 11 പ്രതികളുണ്ട്. ബലാത്സംഗം, തട്ടികൊണ്ടുപോകല്‍, തെളിവ് നശിപ്പിക്കല്‍, തടഞ്ഞുവെക്കല്‍ തുടങ്ങി പതിനേഴ് വകുപ്പുകളും കുറ്റപത്രത്തില്‍ ഉള്‍പ്പെടുത്തിയിട്ടുണ്ട്. 2017 ഫെബ്രുവരി പതിനേഴിനായിരുന്നു നടി ആക്രമിക്കപ്പെട്ടത്. നടിയെ ആക്രമിക്കപ്പെട്ട് അഞ്ച് മാസങ്ങള്‍ക്ക് ശേഷമാണ് ദിലീപിനെ പൊലീസ് പടികൂടുന്നത്.