ശബരിമലയിൽ സര്‍ക്കാറിന് കാട്ടുനീതിയോ: ശ്രീധരൻപിള്ള

പത്തനംതിട്ട: ശബരിമലയിൽ സര്‍ക്കാര്‍ പിന്തുടരുന്ന് കാട്ടുനീതിയോ എന്ന് ചോദിച്ച് ബിജെപി സംസ്ഥാന അധ്യക്ഷൻ പി.എസ് ശ്രീധരൻ പിള്ള. ഇരുമുടികെട്ടുമായി മലകയറാനെത്തിയ ഹിന്ദു ഐക്യവേദിയുടെ കെ.പി ശശികലയെ അടക്കം അറസ്റ്റ് ചെയ്ത് നീക്കിയതിനെതിരെ മാധ്യമങ്ങളോട് പ്രതികരിക്കുകയായിരുന്നു അദ്ദേഹം.

എന്തിനാണ് ശശികലയെയും പട്ടികജാതി മോര്‍ച്ചയുടെ സുധീറിനേയും സ്വാമിമാരേയും അറസ്റ്റ് ചെയ്തതെന്ന് അദ്ദേഹം ചോദിച്ചു. ഭക്തരുടെ സ്വാതന്ത്ര്യം എന്തിന് നിഷേധിച്ചു. ഭക്തജനസമൂഹം ഉത്തരം തേടുകയാണ്. ഭരണഘടന അനുവദിച്ച സ്വാതന്ത്ര്യം അനുവദിക്കാത്ത സ്ഥിതിയാണ്. സര്‍ക്കാറിന്‍റെ ബലത്തിൽ ധിക്കാരത്തിന്‍റെ സ്വരവുമായി പോലീസ് തേര്‍വാഴ്ച നടത്തുകയാണ്. ഇത്കാ ട്ടുനീതിയാണ്. മുൻകരുതൽ തടവിന് കേരളത്തിൽ എന്ത് നിയമമാണുള്ളതെന്നും അദ്ദേഹം ചോദിച്ചു.

നിന്ദ്യവും നീചവും നിയമവിരുദ്ധവുമായ കാര്യങ്ങളാണ് ഇപ്പോള്‍ സര്‍ക്കാര്‍ നടത്തുന്നത്. ഇക്കാര്യത്തിൽ ബിജെപി ശക്തമായി അപലപിക്കുന്നു. ഇനിയൊരു പ്രതീക്ഷയുമില്ല, മറ്റ് സംസ്ഥാനങ്ങളിലേക്കും തുടര്‍ന്ന് സമരം വ്യാപിപ്പിക്കും. നിയമവാഴ്ചയുടെ മരണമണി മുഴങ്ങുകയാണ്. അരാജകത്വത്തിലേക്ക് കാര്യങ്ങള്‍ പോകാതിരിക്കാൻ ഇനിയെങ്കിലും സര്‍ക്കാര്‍ ശ്രദ്ധിക്കേണ്ടതുണ്ട്. ശബരിമലയെ തകര്‍ത്ത് പൈതൃകം നിരാകരിക്കുന്ന അപകടകരമായ രീതിയിലേക്കാണ് കാര്യങ്ങള്‍ പോകുന്നത്.

പോലീസ് അയ്യപ്പന്മാര്‍ ഇനി വേണ്ടെന്ന് പറയുന്നതും അന്വോന്യം അയ്യപ്പന്മാരെന്ന് പോലീസുകാര്‍ വിളിക്കരുതെന്ന് കേരളത്തിലെ രാക്ഷസ ഭരണകൂടം പറയുന്നതും കമ്മ്യൂണിസ്റ്റുകാരുടെ നിരശ്വരപാത ജനങ്ങളിൽ അടിച്ചേൽപിക്കുന്നതിന് തുല്യമാണ്. മുൻകാലങ്ങളിൽ നിലനിന്നിരുന്ന സ്വാമിമാരും പോലീസും തമ്മിലുള്ള സൗഹൃദം തകര്‍ത്തിരിക്കുകയാണ്. ദേവസ്വം ബോര്‍ഡുവരെ ഇതിനെതിരെ രംഗത്തെത്തിയിരിക്കുകയാണെന്നും അദ്ദേഹം കൂട്ടിച്ചേര്‍ത്തു. ശബരിമലയിലെ നിയന്ത്രണം കേന്ദ്രസേനയെ ഏൽപിക്കേണ്ട സ്ഥതിയായിരിക്കുകയാണെന്നും അദ്ദേഹം പറഞ്ഞു.