ശബരിമലയിൽ കേന്ദ്രസർക്കാർ ഇടപെടണമെന്ന് ബിജെപി കേരള ഘടകം

തിരുവനന്തപുരം: ശബരിമല വിഷയത്തിൽ കേന്ദ്രസര്‍ക്കാര്‍ ഇടപെടണമെന്ന ആവശ്യവുമായി ബിജെപി സംസ്ഥാന ഘടകം. ഇക്കാര്യം ഉന്നയിച്ച് കേന്ദ്ര ആഭ്യന്തരവകുപ്പിനും ബിജെപിയുടെ കേന്ദ്രനേതൃത്വത്തിനും സംസ്ഥാന ഘടകം കത്തുനൽകി. ശബരിമലയിൽ എത്താൻ ശ്രമിച്ച സംസ്ഥാന നേതാക്കള്‍ അറസ്റ്റിലായ സാഹചര്യത്തിലാണ് സംസ്ഥാന ഘടകത്തിന്‍റെ ആവശ്യം.

ആഭ്യന്തരമന്ത്രാലയത്തിൽ നിന്നുള്ള ഉന്നതസംഘവും കേന്ദ്രമന്ത്രിമാരും ശബരിമല സന്ദര്‍ശിക്കണമെന്നും കേരളത്തിൽ നിന്നുള്ള എംപിമാര്‍ ശബരിമലയിലെത്തണമെന്നുമാണ് ബിജെപി സംസ്ഥാന ഘടകത്തിന്‍റെ ആവശ്യം.

ഇന്നലെ രാത്രി നിലയ്ക്കലിൽ നിന്ന് പോലീസ് അറസ്റ്റ് ചെയ്ത ബിജെപി സംസ്ഥാന ജനറൽ സെക്രട്ടറി കെ സുരേന്ദ്രൻ, ഒബിസി മോര്‍ച്ച തൃശൂര്‍ ജില്ലാ പ്രസിഡന്‍റ് രാജൻ തറയിൽ കര്‍ഷകമോര്‍ച്ച പത്തനംതിട്ട ജില്ലാ കമ്മിറ്റി അംഗം എംഎ സ് സന്തോഷ് എന്നിവര്‍ ഇപ്പോള്‍ റിമാൻഡിലാണ്. എന്നാൽ സുരേന്ദ്രനെതിരെ കള്ളക്കേസെടുത്തെന്ന് ആരോപിച്ച് ബിജെപി ഇന്ന് സംസ്ഥാന വ്യാപകമായി പ്രതിഷേധം നടത്തുന്നുണ്ട്.