ലഹരിക്കെതിരെ 'വേണ്ട' ഫുട്‍ബോള്‍ ടൂര്‍ണമെന്‍റ് തുടങ്ങി

കൊച്ചി: ലഹരിക്കെതിരെ കുട്ടികളെ സജ്ജരാക്കുക എന്ന ലക്ഷ്യവുമായി ഫോർത്ത് വേവ് ഫൗണ്ടേഷൻ ‘വേണ്ട കപ്പ്’ എന്ന പേരിൽ ഫുട്‌ബോൾ ടൂർണമെന്‍റ് തുടങ്ങി. ‘ലഹരിയോട് വേണ്ട’ എന്നു പറയാൻ ഏവരേയും പ്രാപ്തരാക്കുന്നതിനായുള്ള പദ്ധതിയാണ് ‘പ്രോജക്ട് വേണ്ട’ എന്ന പേരിലുള്ളത്.

കേരള ബ്ലാസ്റ്റേഴ്‌സ് എഫ്.സി. താരങ്ങളായ സി.കെ. വിനീതും സിറിൽ കാലിയും മാച്ച് ബോൾ കിക്കോഫ് ചെയ്താണ് ഈ വർഷത്തെ ടൂർണമെന്‍റ് ഉദ്ഘാടനം ചെയ്തത്. എറണാകുളം ഡി.ഇ.ഒ. കെ.കെ. ലളിത ‘വേണ്ട മാച്ച്’ ടീഷർട്ട് ഡോ. എഡ്വേർഡ് എടേഴത്തിന് നൽകി പുറത്തിറക്കി. പ്രോജക്ട് വേണ്ട ഡയറക്ടർ സി.സി. ജോസഫ്, എക്സൈസ് എ.സി.പി. അശോക് കുമാർ എന്നിവർ പങ്കെടുത്തു.

നവംമ്പര്‍ 24 വരെ കൊച്ചി മഹാരാജാസ് കോളേജ് മൈതാനത്ത് ടൂര്‍ണ്ണമെന്‍റ് നടക്കും. കൊച്ചിയിലെ വിവിധ വിദ്യാലയങ്ങളില്‍ നിന്നും ആണ്‍കുട്ടികളുടെ 16 ടീമുകളും പെണ്‍കുട്ടികളുടെ 2 ടീമുകളും മത്സരിക്കും. വേണ്ട കപ്പ് അടുത്ത പത്ത് വര്‍ഷത്തേയ്ക്ക് മുന്നില്‍ കണ്ടുള്ള പ്രവര്‍ത്തനങ്ങളും ആരംഭിച്ചു കഴിഞ്ഞു. സമൂഹത്തിന്റെ എല്ലാ തുറകളിലും പ്രത്യേകമായി പിന്നോക്കം നില്‍ക്കുന്ന വിഭാഗങ്ങളില്‍ നിന്ന് പ്രതിഭകള്‍ക്ക് മത്സര ഫുട്ബോളിനെ പൂര്‍ണ്ണതയോടും പ്രതാപത്തോടെയും അനുഭവിച്ചറിയാനുള്ള സുവര്‍ണ്ണാവസരമാണ്, വേണ്ട കപ്പ് 2018. നവംമ്പര്‍ 24 സമാപന ദിവസം നടൻ ജയസൂര്യ മുഖ്യാതിഥിയായി പങ്കെടുക്കും.

സാമൂഹിക മാറ്റത്തിനായി പ്രവര്‍ത്തിക്കുന്ന ഒരു പ്രസ്ഥാനമാണ് ഫോര്‍ത്ത് വേവ് ഫൗണ്ടേഷന്‍ എന്ന എൻജിഒ. വിദ്യാഭ്യാസം, ശാക്തീകരണം, സാമൂഹിക നീതി, സാമൂഹിക പങ്കാളിത്തം എന്നിവയാണ് ഇവരുടെ പ്രധാന പ്രവര്‍ത്തന മേഖലകള്‍. കേരളത്തില്‍ 11നും 22നും ഇടയിൽ പ്രായവിഭാഗത്തില്‍ ഉള്ളവരുടെ ലഹരി ഉപയോഗത്തിനെതിരെ പ്രവര്‍ത്തിക്കുകയും ,ലഹരിയോട് വേണ്ട എന്ന് പറയാന്‍ അവരെ പ്രാപ്തരാക്കുകയും ചെയ്യുന്നതിനു വേണ്ടി ഫോര്‍ത്ത് വേവ് ഫൗണ്ടേഷന്‍ രൂപം നല്‍കിയ പദ്ധതിയാണ് പ്രൊജക്ട് വേണ്ട എന്നത്. കൗമാരക്കാരുടെ ഊര്‍ജ്ജത്തെ ക്രിയാത്മകമായ പ്രവര്‍ത്തനങ്ങളിലേയ്ക്ക് തിരിച്ച് വിട്ടും, ലഹരിക്കെതിരെ ശരിയായ അറിവും ബോധവല്‍ക്കരണവും നല്‍കിയും ,കൗണ്‍സിലിംഗ്, പുനരധിവാസം എന്നിവ ഫലപ്രദമായി ഒരുക്കി നൽകിയുമാണ് ഇവരുടെ പ്രവര്‍ത്തനം.